中環在線：湯文亮嫁女
蕭若元契仔做女婿
■湯振玲同新郎周世豪噚日下晝喺教堂舉行婚禮。 受訪者提供
近日財經界喜事浪接浪，大台前主播蔡雪瑩噚日同木薯資源（841）太子爺朱威霖拉埋天窗，樓市「名嘴」、紀惠集團行政總裁湯文亮亦喺同日嫁女，恭喜曬。
■一班代理晚上到四季賀湯文亮。
四季筵開逾30圍
湯文亮噚日喺facebook（fb）po咗兩張相，加埋「我今日嫁女」五個字，宣佈嫁女，認真係簡單而隆重。佢寶貝女湯振玲（Jacqueline）下午喺堅道明愛天主教堂完成婚禮，夜晚就喺四季酒店筵開超過30圍，招待親朋。
年約30歲嘅Jacqueline出名聰明，當年以拔尖身份入讀科大名牌學科環球商業管理，到底邊位俊男可以排除萬難，成功抱得美人歸？
新郎咪就係「才子」蕭若元嘅契仔周世豪（Charles）。Charles今年36歲，喺多倫多大學拎咗經濟系學位之後，就到蘇格蘭皇家銀行嘅私人銀行信貸風險管理部門任職，據講，佢當年曾經協助管理客戶在岸與離岸資產超過100億港元。佢之後轉行，去香港TUVE精品酒店擔任項目經理，再到標準資源（091）做投資者關係主管。
今年2月，即係Charles結婚前兩個月，由蕭若元位公子蕭定一打骰做主席嘅中國3D數碼（8078）就搵咗佢做執行董事，實行齊齊搵食。
Charles年青有為，加上同「物業大王」千金一齊，肯定唔使「睇少啲戲，去少啲日本」，唔使為置業問題擔憂。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
