揀錯市場上錯市
2016年04月01日
港股昨日焦點係萬達商業(3699) 動用超過三百億元，建議私有化，消息公佈令集團股價急升。由於萬達商業上市只有一年幾，突然間話退市，令人產生好多聯想，大家最關心係家去追有無着數，以及有無其他相似股份可以尋寶。
萬達商業獲母公
司萬達集團提出私有化，每股作價不低於48元，相當於2014年12月22日上市招股價，消息公佈後集團股價急升後回穩，收報45.95元，急升18.5%，仍低於建議私有化價格。受消息刺激，同系萬達酒店發展(169) 也急揚15%，報0.91元，成交金額174萬元。
萬達商業退場，一般估計係老闆王健林不滿股價折讓大，寧願唔喺香港上市，改返內地，認為估值會仲高。有大行就加把嘴，野村火速發表報告，認為萬達現時估值平，叫人唔怕買。
博萬達加價要識轉膊
佢話，萬達商業去年租金收入按年升31.2%至136億元人民幣，去年有26個商場開幕，今年更有50個新商場開幕，估計萬達商業未來三年租金收入複合增長可達27%，到2018達到280億元人民幣。該行認為投資者收集萬達，因息率達4至5%，加上現時預期市盈率達7.6倍，每股資產淨值(NAV)折讓43%，比華潤置地(1109) 預期市盈率8.3倍及NAV折讓36%吸引。
家萬達商業由大股東提出私有化，佢股價比私有化作價低幾個巴仙，呢個主要係反映利息成本，即係話好多人預期佢私有化成功，甚至有部份人估佢會加價，大股東係咪咁順攤呢？大家就要估吓王健林呢位內地首富嘅做事手法啦，因為私有化一旦失敗，股價就會插番轉頭。
內地首富喺香港上市一年幾就話退市，仲講到佢會掉番轉頭返內地上A股，有中環茶友話咁係咪代表佢揀錯市場上錯市？要評論首富有無上錯市，先係唔可以用倒後鏡去分析，須知內地市況瞬息萬變，同香港商業環境穩定唔同，一年幾前內地房地產資金鏈好緊張，又話內地商業項目被電貿打殘，搞到融資好困難，家內地至少資金供應就好番好多，有點事過境遷，正如馬雲當年將阿里巴巴上市，後來又私有化改去美國，雖然佢只係來香港走咗一轉，但咁就過咗海做神仙，所以家富豪做生意手法係大開大合，唔會計得咁細。從呢個角度講，如果你信萬達商業會係另一個市場上市，咁咪可以博佢加價囉，不過正如我講，內地富豪做嘢轉身好快，今日咁諗、明日可能已經唔同，股民同佢玩，都要有同一思維，隨時要準備轉膊。
喺富豪有大動作下，恒指雖然前日急升，昨日都回吐唔多，只係跌咗26點，收報20776點；國指則升23點收報9003，成交710億元。今年首季度計，恒指累積下跌1138點；國指累積下跌658點。股民期間勝負關鍵係農曆前後部署，若然春節前入市，咁就弊傢伙，相反無買貨的話，過完年低撈，咁就可以做贏家。
人仔拆息首現負利率
昨日金融市場值得一提嘅現象，係本港離岸人民幣銀行同業隔夜拆息跌至負3.725厘，較昨日跌4.773個百分點，是有紀錄以來首次出現負數，即係銀行拆出資金時要支付利息。
離岸人民幣隔夜拆息跌至負數水平屬意料之外，反映市場資金非常充裕。恒生銀行(011) 執行董事馮孝忠估計，炒家早前為沽空人民幣借入的遠期外匯盤，隨着人民幣上升開始平倉，導致大量資金充斥市場。 早排炒家嗌到拆天話人仔會急跌，又話已經大手沽空等食胡，家證明佢哋已經敗走，所以話大鱷之言要聽，但只能做參考，唔可以完全信佢支笛。由於大鱷受創，估計會有一輪平靜。
陸羽仁
金融High Tea 舊文
來源 source: http://hdfin.stheadline.com
