魚樂無窮：熱炒板塊有路捉
港股連番悶局，噚日藉美股爆升報復性反彈，挾升500點，睇真啲，高低波幅只得200點，買貨最狠嘅，唔係基金唔係散戶，而係儲咗大量空倉嘅淡友，平完淡倉後收手，突破動力自然欠奉。
有人話，淡靜市係儲貨最佳時間，呢個好視乎你想買乜。內銀股嘛，隻隻六七厘息，PB唔夠1
倍，正到暈，但潛藏壞賬完全冇反映，徹頭徹尾係價值陷阱。點解股市phone in節目，哭股喪嘅大部份都係內銀蟹民，心中有數吧。地產股，股價低NAV一大截，又係平靚正，但本地經濟有幾差，大家有眼見，樓價正靜待終極一跌；係，樓價同地產股係冇直接關係，股價雖有一定承托力，但買咗唔識升，都夠令人氣餒。
坊間有兩類股票，一直係資金寵兒。第一類，公用及高息股。你睇電能（006）、中電（002）、領展（823）、置富（778）全部貼住高位行，想低吸？你要有等樓價跌一樣嘅耐性。第二類，殼股。立基（8369）上市大半年即批股，惹來賣盤憧憬，單日曾經喪升一倍，成交億億聲。創業板都炒到咁癲？只有最好嘅同最差嘅有資金追捧，這就是港股的特性。
唐牛
http://www.facebook.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
