阿爺維穩 股市無波
2016年05月25日
《華爾街日報》引述接近人民銀行消息人士報道，人行自今年1月4日已取消由市場確定人民幣匯率的做法，重返由人行嚴密管控的舊制。呢單消息聽咗唔覺得奇怪，因為睇人仔匯價，就估到阿爺已經出咗手。阿爺叫停匯改，等如人民幣暫停走出去，短期相信會令港股資
金減少，但換來較穩定嘅局面，大市少咗被人狙擊大上大落嘅風險，但有可能出現陰陰乾局面，喺呢啲環境投資就要加十二分耐性，唔可以諗住一朝發達。
叫停匯改好過失血
《華爾街》呢篇文章話，人民幣去年8月匯改，隨之觸發人民幣貶值令資本外流，甚至連中國人自己都千方百計挪移資金到海外，令國家主席習近平震驚。在去年底一個保密會議上，習近平就訓示官員，中國的市場及監管制度不成熟，主要官員未有做足本份，引導經濟更持續增長，人行對這番言論，只有一個可能的詮釋，就是煞停改革。呢個消息本來喺保密會議提出，點解國家機密會流出街呢？答案最大機會係有人想將呢件事昭告天下。正如文章所講，人民幣市場化，被視為中國十年來最重要的金融改革，實際上卻是最大的政治角力場地，人行不佔主導地位。中央領導層緊盯匯率政策，去年中人仔貶值，引起鄰近地區貨幣的骨牌效應，習近平立即下令，人行要穩定匯價。
將內地放棄匯改，聯繫到《人民日報》五月初刊發一篇權威人士報道，提出要面對L形增長，取向與政府提出的幾乎是一百八十度「轉軚」。這篇文章外界普遍相信是由習近平的經濟智囊授意刊登，加理《華爾街》呢次爆料，都係指向中國喺現階段求穩的經濟政策。陸羽仁對《華爾街》呢篇報道唔覺意外，因為佢基本上只係為近日見到嘅各項內地財金政策提供咗政策背景。按照呢個方向去睇，人民幣原本去年作勢湧出的估計不會出現，甚至資金有可能因為要穩匯價出現倒流，所以大家短期唔使望有大茶飯食，而咁做最大好處，係人仔匯價重回阿爺操控，咁大鱷想狙擊亦唔容易，降低咗市場波濤洶湧嘅風險，咁即係話大家好難發達，亦無咁易輸身家，投資買股有得執就當贏嘞。
短期難發達 買股鬥耐心
無咗大水，恒指呢排都係波幅輕微，個市昨日先升後跌，一度跌97點，尾市有少少買盤吸納，最終微升收市。恒指全日收報19830點，升21點；國企指數收報8306點，跌1點或；成交447億元。
股市淡靜，但對有耐心嘅投資者嚟講，都係細心揀股低吸嘅時機。呢排體育用品股被基金輪流食胡，股價大部份弱弱哋，但呢個時候亦有啲具特別概念嘅股份有出色表現。以生產內衣物料嘅公司超盈(2111) 就獲大行推薦，股價喺悶市急升。
呢間公司是全球少數提供一站式解決方案的女性內衣物料製造商之一，能夠為女性內衣品牌商提供全面女性內衣物料產品系列(包括彈性織物面料、彈性織帶及蕾絲)，與首屈一指的國際女性內衣品牌如安莉芳、Victoria"s Secret等有長期合作。不過，公司現時增長點係女性運動衣服。由於女士家好興玩各式各樣運動，由瑜伽到打技擊都有，令彈性運動裝需求急升。
為了應付需求，集團喺中國同越南擴產，大和發表報告，透露該行分析員早前與超盈(2111) 管理層見面，集團擴產計劃符合進度。而公司核心內衣材料業務保持穩定，其客戶Victoria"s Secret內衣環球銷售續向上，配合擴產下可再提升盈利。大和重申「買入」超盈，目標價由5元升至5.5元，折合預期14倍市盈率。超盈昨日收5.12元，升咗6.7%，以工業股嚟計，14倍市盈率屬偏高，主要係反映市場對佢前景嘅溢價。由於大行唱好效應，股價炒上咗，喺家咁嘅市當然係唔好高追，寧願等機會低吸，低吸唔到就再揀過。
另一隻有相同概念股份維珍妮(2199) ，昨日佢收9.86元，升咗4.4%，可見喺淡市都仲有人入貨。
陸羽仁
金融High Tea 舊文
來源 source: http://hdfin.stheadline.com
