笑到最後 - 高明 2016年6月13日
笑到最後：
Lancôme教點入中國
■Lancôme公關教了大家，點用最低成本引起中國市場注意。 資料圖片
Lancôme跪低事件，持續一周都仲有故講，係社交媒體生態下嘅異數。有人講好過冇人講，Lancôme公關教咗大家點用最低成本引起中國市場注意。想打入中國市場嘅可效法Lancôme。
首先，品牌未成功入過中國，呢個背景基本上冇嘢輸。然後，高調搵個被中國認為係反中亂港嘅人做代言或開音樂會，由何韻詩到黃之鋒都得，呢類代言人好處係冇財大氣粗嘅大陸公司炒貴，價錢合理。
入大陸嘅東風，係《環球時報》同中國網民。大把乖乖地做順民嘅牌子喺大陸寂寂無名，敗興而歸。但只要佢哋「定性」你反華，即刻有傳媒同網民主動幫你宣傳。稍為無懼批評，已代表你嘅產品唔係「made in China」；如果喺壓力下企硬，維護品牌尊嚴，即管理上無一絲中國特色：無假貨、無溝稀、無毒。中國少數已富起來嘅中產睇到，就知係好嘢，情況一如日本廁所板。
點樣喺唔入中國下賺中國人錢，蘋果iPhone已示範過多次，喺香港成離岸中心。就算中國有分店，中國用家都寧要香港水貨，奶粉、黃金、iPhone、益力多、甚至米，全部都係托買辦運上去。因為中國分店店員都不被同胞信任，一樣有機會買到假貨，不如落嚟香港買。呢招對從未入中國嘅公司係有贏冇輸、本少利大。所謂得罪中國根本冇得輸，得罪一班冇購買力嘅中國網民，換嚟係借佢把口宣傳。中國人口多，只需取悅關鍵少數已足夠。時刻記住「20/80法則」，兩成人擁有社會多數財富，中國13億人，有理由相信「網軍」就係無用嘅10億人。動輒「代表13億人」嘅意見水份太多，唔使太理。
最重要係入中國市場攞唔攞到錢走，好多大企業入中國，產品被抄，臨走仲要被人告轉，得不償失。30年前已打入中國市場，中國人正值高增長初期，要靠外資；今中國已自覺強大唔使靠外資，高速增長又到盡頭，國內企業都爭崩頭，幾時輪到外資？
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
