異動空間：當今最瘋狂資產
■「債王」格羅斯話，債市會似「超新星」般爆炸，但幾時爆無人知。 彭博資訊
從前有兩個人，手上各有個罐頭，大家協議互相交易，每次都用更高價錢買對方的罐頭，價格水漲船高，直至去到天價，A君好奇打開罐頭，發現只係一條已發臭的沙甸魚！他質問B君：「為何賣過期罐頭畀我
？」A君答：「不是協議罐頭只用來交易嗎？你點解打開佢？」
以上比喻最啱形容目前債市的瘋狂。全球央行放水買債成癮，逾10萬億美元債券已跌至負息，即貼錢買債，為何投資者繼續瘋搶？因負利率不等如負回報，只要下家出更高價掃你手貨，負息一樣贏錢。家陣係債市牛三，全世界在玩接火棒遊戲。大家都知債券不應負息，但音樂椅一日未停，高買更高賣又何妨？幾時完？三個可能性：（1）全球經濟好轉，risk-on買番股票，債價就冧；（2）央行嫌貴唔再買債；（3）企業債大規模違約，令市場失信心一齊掟債。
雖「債王」格羅斯話，債市會似「超新星」般爆炸，但會唔會爆、幾時爆無人知，無謂亂估。道指公用事業指數創新高，不妨隨大勢買公用股收息，香港電訊（6823）高位橫行個半月，蓄勢突破，值得先落注。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com
