中環在線：
一帶一路廣告 任總投閒置散？
金管局前總裁任志剛（圖）呢個星期為獅子行製作嘅一帶一路廣告粉墨登場。有趣嘅係，呢輯廣告一共有6位財金名人排住隊出場，任總竟然只係排第3，唔通人走茶涼，連任總都冇咁受重視？
雖然大家成日聽住一帶一路，但係始終唔知係乜東東，匯豐就帶頭，搵人製作一
輯廣告講解何謂一帶一路，當中又有乜商機之類。
成輯廣告分6段，每段由一名人孭飛，包括匯豐銀行副主席兼行政總裁王冬勝、利豐大股東馮國經、和記港口董事總經理葉承智、港鐵（066）行政總裁梁國權、中電（002）副主席阮蘇少湄同埋任總。
匯豐：要講貿易機會先
匯豐要拍廣告，由王冬勝打頭陣當然無懸念，之但係，聞說王冬勝係出動人情牌搵任總出鏡，點解任總被安排跟馮國經之後先出場呢？須知道明星都講出場次序排位，排頭位或壓軸登場先至顯身份喎。
獅子行方面就解釋，今次並非論知名度，而係要講一帶一路有乜商機，咁先係有貿易機會，咪由做開貿易生意嘅馮國經行先；有貿易就要融資，於是由任總講佢最在行嘅人民幣國際化、融資等；跟住再講物流、基建、能源。
5位嘉賓全部做義工，聽聞拍攝過程好快趣，等於佢哋平日做財經訪問咁，任總拍咗一粒鐘就搞掂，咁又係，人仔國際化，佢倒轉都識背喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
