操盤手劄記：大媽旅遊利中航信
■大媽最愛遊埠，早年港澳自由行，今年梗係去歐洲喇。 資料圖片
港股下半年開局本來唔錯，可惜歐洲再有公投憂慮，意大利計劃10月舉行修憲公投，加上英國脫歐後，三隻房地產基金暫停贖回，市場避險情緒再現。英倫銀行撤回3月時對銀行業逆周期資本充足比率嘅決定，英鎊
兌美元昨一度急跌至1.2797，兌港元曾穿「10算」，創31年新低，市場更加腳軟。
外圍吹淡風，港股昨裂口低開，以為20500至20600點附近滙聚3條平均線（10天、20天及50天線）可守一守，點知弱不禁風，100天線亦一度失守，收20495點，跌255點或1.2%。恒指喺4月、5月、6月三度升穿21000點見頂後急回至20000點之下，周一高見21166點後無力再上，周二呈黃昏之星，昨見島型頂，睇怕要回試20000點關，甚至浪底19600點。
不過，後市唔使太悲觀，中港兩地股市仍有利好因素：一，深港通雖未通，但應就快；二、北戴河會議約7月底召開；三、養老金預計8月入市。市場一向炒預期，上述因素會係催化劑。內地中產崛起，旅遊需求日增，大媽有錢就係任性，最愛遊埠爆買，早年港澳自由行，去年日圓平去日本，今年梗係去歐洲喇，尤其英國，英鎊平嘛！
近日心水係中航信（696），公司大股東係中國民航信息集團，持股29.29%，另由13間中國商營航空公司合共持股38.84%，包括國航（753）、東航（670）、南航（1055）等。公司為近400間中外商營航空公司提供電子旅遊分銷服務、機場旅客處理系統等。換言之，出境又好，入境又好，賣一張機票，就賺一張銀紙。
中航信5月收購旅遊科技商OpenJaw，又與英國航空及四季酒店等合作，可受惠於產品供應擴闊及旅客基礎多樣化。據彭博綜合券商預測，中航信2016年至2018年營業淨利增長分別為14.6%、18.7%及9.9%。中航信現價14.96元，PE20倍，以其增長速度唔算貴，加上壟斷性質，理應值更高估值。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
