第二波震盪
2016年07月07日
全球股市反彈一輪，大家睇睇吓忽然覺得英國爆隻脫歐黑天鵝出嚟，無理由乜事都無喎，諗諗吓又有啲驚，加上英國三大房地產基金突然暫停贖回，英鎊大瀉，避險意識再升溫。
除咗英國外，歐洲開始有啲燶味，早前德國同瑞士兩間大銀行財政狀
況被質疑，但真正令人擔心嘅係意大利，歐羅區甚有危機再起嘅味道。
意國銀行有燶味
英國同歐盟攬炒，歐盟狀況暫時唔好得過英國。英國主要係貨幣急挫，英鎊兌港元已經跌穿10算，歐洲的弱國財政狀況開始引起憂慮。《華爾街日報》就指出，英國脫歐，歐洲其他國家的損害可能更直接同嚴重，文章仲特別提到意大利銀行業，擔心是下一場金融危機的風眼。
報道指出，意大利17%的銀行貸款是壞帳，不良貸款在歐羅區上市銀行不良貸款總量中幾乎佔到一半。意大利政府已請求歐盟准許其向國內銀行注入400億歐羅，而德國與歐盟其他國家對此有意見。由於意大利銀行冗員多、分行多，獲利能力在歐洲銀行中一直墊底，導致幾乎沒有多餘資本來覆蓋壞帳。意大利銀行一直被批評做生意手法過於傳統，獲利幾乎都以常規貸款為主，在低利率甚至負利率時代受傷慘重。
當地監管也備受質疑，多年來鬆懈的審貸標準，讓意大利銀行業在幾年前面對經濟滑坡導致的破產案激增時難以應對。現時英國脫歐突然一個大浪打來，大家就估計意大利銀行最有機會被洪水沖到甩褲。公投後意大利銀行股首當其衝大跌，6月23日以來，追蹤歐洲銀行股票的一個指數下跌17%，今年累計跌幅達30%。意大利銀行西雅那股價過去兩日累跌30%創新低，搞到意大利監管機構禁止沽空該股，股價早段反彈10%後停牌。
外電報道，意大利政府考慮成立銀行基金向西雅那注資，希望在歐洲央行公佈壓力測試結果前補充銀行資本。喺意大利銀行要政府出手打救下，外圍恐慌情緒再度上升。
英國房託基金停止贖回同意大利銀行出事，相信已觸動脫歐嘅第二波震盪，在外圍不穩下，恒指一度挫逾四百點，好彩A股造好，令港股仍能守住兩萬點大關。恒指收報20495點，急挫255點；國企指數收報8503點，下滑140點，成交金額607億元。由於震央來自英歐，喺英鎊飛墜下，匯控(005) 全日跌咗1.16%，造46.8元，已算跌得唔多；保誠挫3.2%，造121元；於當地有不少投資的長和(001) 降0.72%，造82.4元；長江基建(1038) 跌0.61%，造64.75元。
市場恐慌升溫，資金湧入黃金避險，金價一度升穿1370美元關，一眾金礦股果然繼續攀升。紫金(2899) 升4%，造2.81元；招金(1818) 仲勁，抽升8.4%，造9.17元；靈寶黃金(3330) 升5.5%，造1.74元；SPDR金ETF(2840) 升1.55%，造1013元。
炒有線已經升凸
個股最搶眼係有線寬頻(1097) 發通告，證實已接獲獨立第三方多份有關收購有線寬頻的提案，有線寬頻收造0.81元，再大升28.57%。由於《東周刊》報道于品海想買起有線同九倉電訊，涉及資金近百億元，令到股價噪動。有啲股民搞得唔係好清楚，以為有線家市值就算急升後只有18.1億元，咁咪有排炒？
其實有線只係經營電視業務，網絡同電訊業務屬於九倉，電訊資產早前已放聲氣想賣，賣方話作價要10億美金，即係接近70億元，所以大家唔好計埋呢條數。睇番有線，佢多年虧損，去年蝕2.3億，加埋個殼畀夠佢值10零億，家升到18億都反映晒，若我有貨就會走人，再升唔奇，但只係亂炒。
另外九倉(004) 已放風話會賣電訊資產，消息已經消化，加上集團資產龐大，所以賣嘢無乜刺激，股價只能跟大市下跌，收造46.6元，跌1.27%，再炒空間也不太大。
陸羽仁
金融High Tea 舊文
來源 source: http://hdfin.stheadline.com
