你夾高 我食胡
2016年07月27日
臨近月尾結算，大戶夾高計數味道甚濃。周一U盤重臨，大戶就已經出招，大力競價推高重磅股騰訊(700) ，翌日開市呢隻股王就開足馬力推高大市，後來中國股市在憧憬放水下接力造好，令港股跟升一度漲300點，但收市前就開始見有資金食胡，令升幅收窄。
中國重啟新股上市，今市場擔心失血，但人行連續兩日進行逾千億元逆回購放水操作，市場憧憬人行繼續大規模放水呵護市場，刺激滬深兩市昨日顯著造好。上證綜指輕微低開後拾級而上，以全日最高位收市，報3050點，升34點，企穩在3000點樓上；深證成指報10852點，升133點，但同香港一樣係成交奀奀，兩市合共4851億元人民幣。
新意網搞數據實有賺
中國3點收市後，港股沽壓增加，升幅逐步收窄，恒指收報22129點，升136點；國企指數收報9062點，上漲27點。睇嚟有投資者想係聯儲局開會前先食吓胡，畢竟買股賺錢，落咗袋至係真銀，見大戶推高，就不妨借勢食吓胡先。如今市場對加息預期低，聯儲局無預示加息大家預咗，刺激不大，萬一有少少暗示未來會加息，大市易仆低，難怪有人打穩陣波先食胡。
港股再挑戰今年新高，主力係高息股，仲有科網股。領展(823) 及港鐵(066) 同創上市新高，領展升0.09%報57.25元；港鐵升1.64%報43.4元。係《Pokémon Go》概念帶動下，騰訊股價再創新高，仲有多隻科網股都造好，不過下午回吐壓力增，騰訊高見189.7元後回軟，倒跌0.9%，收報186.3元。
除咗騰訊呢啲大股，仲有一隻創板股都係呢個概念受惠者新意網(8008) ，佢呢幾日股價上咗新高，昨日收報3.1元，升4%。
新意網主要從事互聯網服務中心及資訊科技設施，包括提供數據中心、設施管理、網上應用及增值服務，SMATV、CABD、鋪設電纜及保安系統，包括有關系統之安裝及保養服務，另外又持有物業。睇番佢業績，呢兩年都比較穩定，無乜大起大落，截至2016年3月底止第三季度業績，純利為1.3億元，按年增幅4.6%。現價市盈率唔低，有22倍，但肯派息，息率有4厘。
新意網主要做數據服務，在香港做收據中心首先要有地，又要有錢投資基建，入行門檻唔低，佢喺比較早投入嘅公司，加上有大股東新地支持發展，市場認為佢一早有條件轉主板，不過佢就好似唔係太在意。
《Pokémon Go》搞到咁哄動，但後來大家發覺有份開發嘅任天堂，絕對唔夠提供平台嘅蘋果咁好賺。同樣地，大家搞科網搞到咁起哄，有人大賺、有人輸錢，但做數據中心嘅公司就點都收梗錢。呢類股份概念有限，不過計起數可能就抵買過炒到好高嘅房託啦。
瑞信唱好 廣汽破10元
汽車股近排都吸引唔少大行推介，廣汽(2238) 獲瑞信上調目標價，股價昨升穿10元大關，一度高見10.34元，收報10.26元，升7.1%。瑞信話，廣汽嘅GS4 SUV自產品組合改善後，已成為主要純利動力，故該行上調廣汽2016至2018年每股盈利預測5%至12%，維持「跑贏大市」評級，目標價由12元升至13元。
我過去都有睇好廣汽，今個升浪佢上過10.76元高位，剛好回落，遇上瑞信唱好，又再拗腰彈吓。其他車股方面，吉利(175) 升5.9%至5.19元；長城汽車(2333) 漲5.2%至7.87元，為表現最叻的國企指數成份股；北京汽車(1958) 升4.8%至7.22元；比亞迪(1211) 升0.7%至51.6元。
陸羽仁
金融High Tea 舊文
來源 source: http://hdfin.stheadline.com
