財女手筆：二手業主反價再反價
■樓價雖反彈，但準買家都唔好衝入市場買貨，破頂高追。 資料圖片
上上回講到，沙田非藍籌屋苑不嬲呎價低水，一個兩房二手樓一放盤，睇樓客好似玩緊《Pokémon GO》發現比卡超咁，一晚6批客瘋狂湧上去睇樓，嚇到業主封盤，最後結果係點？個業主同第一批
客人傾好價錢，準買家落定兼簽咗臨約，點知業主hold住份臨約幾日，之後……決定唔簽再反價！
近日不時聽到業主反價，不過，傾好價、交曬票、準買家簽好臨約，賣家死都唔簽臨約，拖拖拖再反價，幸而準買家有心買樓，做足準備預咗入市，反價照買，叫佢定金照收，不過，世事總係一波三折！
賣家又再反價，大佬，原來死都唔簽臨約，係真有其人！唔通真係「有食唔食，罪大惡極」？
樓價反彈，喺跌市中好忍得嘅準買家，忽然忍功全失，唔單止衝入市場買貨，仲要破頂高追！其實冷靜真係好緊要，準買家首先做好壓力測試，確定自己在未來加息、樓價下跌時，仍然有能力供樓自住，同時未來十年、廿年可以正常生活，包括養家、結婚、生仔等等，否則，買到樓並唔見得係好事。
故事中嘅準買家，並無高追呢個一反再反嘅樓盤，反而放手再等時機遇上心水盤。未見放鬆的樓市政策、樓市成交、經濟等各方面都指向樓價慢慢跌，買家新手應該冷靜嚇先，至少，唔好再破頂高追！
上上回傳送門：
睇樓客湧至嚇親業主
http://bit.ly/2abm4nM
Melody
http://www.facebook.com/whichroad
本欄逢周三刊出
Melody
財女手筆 - Melody 舊文
來源 source: http://hk.apple.nextmedia.com
