操盤手劄記：
天溢前景值得憧憬
■天溢於新年度業務有另一番光景，值得留意。 公司網頁
甫踏入8月，天氣、政治都打大風，一開波就8號波！不過，妮妲勢洶，未及馮驊勢兇！港股周一承接「七翻身」升5.3%之勢，再衝上1.1%，重奪兩萬二關；周二打風休市，但外圍出事，德國商業銀行盈警、意大利
裕信銀行財困，歐洲銀行告急，拖累歐股兼波及美股；昨日港股跟隨外圍跌勢，裂口低開385點，全場喺不足100點內上落，收21739，跌390點或1.8%。
今日英倫銀行議息，市場憧憬減息兼加碼量寬。上周美國聯儲局議息，則玩「狼來了」，小心明日嘅美國7月就業報告，或會成為聯儲局加息口實。美股連升四周後，道指已連跌7日，畢竟經濟和企業盈利增長唔足以支䇛太高嘅股價。美股掉頭，環球股市亦無運行。
港股兩萬二關有力升無力守，呢啲時勢take profit為上！有「小國務院」之稱嘅發改委，昨晨發文指要擇機降息、降準，但阿爺上星期先話要抑制資產泡沫。另一方面，美國息魔出沒，加上敵視華爾街、主張炒耶倫魷魚嘅「大隻講」特朗普越戰越勇，淡友隨時借勢狙擊。
之前喺銅鑼灣見到森美NFC（非濃縮）橙汁做試飲推廣，醒起天溢森美（756）係6月底年結嘅公司，大約8月尾派年度成績表。睇番公司中期業績，由於有一次過支出而少賺兩成，全年業績難寄厚望，但至今未發盈警，相信未至太差。不過，有大戶喺業績前洗倉，股價跌至0.7元樓下才見支持。
買股買前景，天溢今年失利，但新年度就另一番光景。公司係中國少有嘅一條龍橙汁產銷商，除咗產銷自家品牌森美純鮮橙汁，仲有售賣鮮果，以及為可口可樂等飲品商供應濃縮橙汁。公司喺重慶嘅春橙新果園，五年一造嘅收成年底開始，令橙源倍增，今後一兩年將提供新盈利。天溢現價0.7元，每股NAV都1.43元（1.221元人民幣）。該股由2014年起無派息，若恢復派息，必可提振股價。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
