賣產派錢止吓咳
2016年08月04日
香港因為打風停咗一日市，但重開避唔到跌市，而且仲一跌幾甘吓。睇番外圍形勢，日本救市力度比想像中弱，日圓飆升，再睇埋黄金走勢硬淨，加上歐洲銀行股又開始腳軟，幾樣嘢都顯示市場避險情緒升番，上日美股下挫。要留意喺呢個情況如果持續，美股仲有下行空間。
留意避險情緒有升溫跡象
今年上半年，尤其係第二季，基本上避險情緒主導咗市場，特徵係美元升完回軟，金價、油價大反彈，喺咁環境下，全球股市整體都乏力，港股更加係屢試二萬點關口。呢個情況去到英國脫歐後，市場一度改變睇法，預計各國央行會大力救市，美元轉強，令本來已強嘅美股屢創新高。
不過，食完一輪驚風散，各國央行見匯市、股市無畀英國脫歐呢隻黑天鵝嚇散，開始回復鎮定，各國無急於放水。上星期美國聯儲局開會，仲話預期短期嘅經濟威脅已經減退，央行放水的假設慢慢失效，於是市場避險情緒又開始增加番。喺港股低位回升咁多後，呢個趨勢就好值得留意嘞。
由於外圍情緒有變，恒生指數裂口低開386點，全日都係低位爭持。恒指收報21739點，急插390點，跌完彈唔起；國企指數收報8978點，下滑150點，成交700億元。隔夜期油曾失40美元關，啱啱又發盈警嘅中海油(883) 再挫4.4%，造8.85元，一個星期內由高位已回調超過一成。
希慎宣佈中期業績，核心盈利只能微升，反映零售不振對租金影響開始殺到。同係收租股的九倉(004) 股價沽壓重，成為包尾藍籌股，收造50.75元，挫5.8%。另外，升得多嘅中電(002) 喺公佈業績後都下插3.7%，穿咗80元大關，收報79元。
昨日最特別嘅係宣佈中期業績嘅匯控(005) ，佢業績比市場估計差，但表示下半年將回購不多於25億美元的股份，加上派息維持，股價先跌後回升，全日收造51.6元，升1.6%，靠派息加回購跑贏一眾藍籌股，罕有成為逆市奇葩。
匯控(005) 公佈截至6月底止中期業績，除稅前利潤為97.14億元美元，按年跌28.7%，當中匯豐香港上半年稅前利潤20.81億元美元，較去年同期的34.62億元，下跌39.9%。匯控數字一公佈，市場初時反應認為較預期差，股價下度一插近1%。
隨後集團透露會大量回購股份，行政總裁歐智華在電話會議中解釋，今次為集團首回購股份，強調回購是因出售巴西業務後釋出資金，加上過往出售美國信用卡業務後一次過把資本回饋股東。佢仲講明，今次回購屬於單次安排，並非恒常機制。但他同時提到，美國業務明年恢復派息，是2007年以來首次，不排除日後在監管機構批准下回購更多股份。呢招一公佈，股價就轉跌為升。
匯控回購夠高招
大笨象管理層擲真銀回購，呢招似乎贏得市場一定好感。摩根士丹利發表報告，稱讚匯控(005) 實行25億美元股份回購計劃，此舉為投資者帶來驚喜。
花旗就話，匯控維持每股0.1美元季度息，另會推出25億美元回購股份計劃，展示出其強勁的資本水平，能穩定投資者對匯控維持分派水平的信心。
匯控業績好多人都話麻麻，顯示銀行做生意難，國際銀行做生意仲難，大笨象管理層賣產回購就成為止咳救命草。有中環茶客同陸羽仁半恭維半講笑咁話，你啱啱先講完銀行難做不如賣盤，匯控就用賣旗下資產所得搞回購喎。
我就答佢，匯控管理層做法絕對明智兼符合股東利益，佢家市帳率0.7倍，而且銀行資產多數係現金。
雖然話賣產長遠不利增長啫，但生意惡做做嚟為乜？以佢嘅家當咁多，賣咗出去有排派，點解仲要勉強死撐落去？歐智華係聰明人，唔使人教都知唔派錢塞住股東把口，好快就俾人踢落台啦！
陸羽仁
金融High Tea 舊文
來源 source: http://hdfin.stheadline.com
