操盤手札記 - 割柑人 2016年9月22日
操盤手劄記：
不妨留意大媽愛股
■一江北水向南流，不妨留意大媽愛股。 資料圖片
近日本地新聞好睇過國際新聞，政治新聞又好睇過財經新聞。一單橫洲黑幕，見盡祥和系（梁志祥、曾樹和）嘅嘴臉、特首及司長嘅滑頭，仲有地主扮苦主，睇嚟好戲在後頭。財經新聞方面，主要都係例牌菜——日本、美國議息。
美國議息結果淩晨兩點開估，港股喺開估前繼續牛皮市，但連日喺10日線與20日線區間上落後，昨終收復10日線，收23669，升139點。內地資金持續經滬港通流入港股，唔知係怕美國加息拖累人民幣貶值，抑或係為11月深港通開通作出部署。自8月16日深港通拍板後，北水滾滾而來，8月17日至9月21日，港股通淨買入金額近630億元，主要買入金融股、科技股、內房股及汽車股，呢啲股份會有流動性溢價，可睇高一線。
一江北水向南流，不妨留意大媽愛股。過去幾日，淨買盤最多嘅首五位係滙控（005）、工行（1398）、平保（2318）、建行（939）及中行（3988），但呢幾隻金融股，除咗平保之外，都係盈利前景有隱憂嘅，就算有5.3至6.7厘高息撐住，都唔係我杯茶。我雖然好息，但只愛有盈利支持嘅高息股。
本來金九銀十，內房股當旺，但踏入9月，京滬深樓價創新高；加上近日地王湧現，令人擔心中央會打壓。不過，房地產作為全國最大產業，係經濟增長支柱之一；而且上半年內銀樓按貸款大增1.1倍，佔總貸款超過三成，好明顯樓市已綁架銀行，中央出手會有顧忌。
內房股有危亦有機，揀股要識趨吉避凶，心水係講明唔會盲搶地，兼有望入圍深港通名單嘅旭輝（884）。旭輝唔少地盤係同其他地產商合作，從而令土儲增加，唔使高價搶地。內地拍檔多數係比較保守嘅中小型地產商，亦有夥拍恒基中國等。集團上半年業績平平皆因入賬先後，下半年應有佳績，今年銷售可望超過500億元，由中型地產商晉身中大型地產商，估值有望提升。旭輝昨收2.55元，料息率近7厘。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
