國策透視：A股被內房綁架
■內地樓市今年興旺，資金炒樓不炒股。 資料圖片
港股火紅火綠，A股持續低迷。筆者曾提及，內地非銀行金融機構貸款5月起由跌轉升，極有可能證金公司又再借錢托市。但國家隊以洪荒之力托市，滬指至今在3000點附近浮沉。據內地證券登記數字，3月起冇貨的股票賬
戶比例逐步上升，由50%升至8月的54%，連續六個月有一半股民冇入市。點解A股會咁低迷？
答案在內地樓市。內地股樓表現一向相反，樓市今年興旺，資金炒樓不炒股。A股由散戶話事，八成資金來自散戶，只有兩成來自機構投資者。散戶資金有限，既然投入樓市，買股票的錢就減少。
目前在深圳、上海，一個稍微高檔的單位售價至少1,500萬元人民幣。據內地媒體統計，去年A股有四成公司盈利低過此數，連深圳一個單位都買不起。照道理，股市應該集中了最賺錢的公司，是財富機器，但比起樓市，簡直無可相比。
內地實體經濟越來越差，企業融資管道又未能打通，資金集中流入樓市，整個經濟被樓市綁架，情況越來越像上世紀90年代爆煲前的日本。內地在1998年實施商品房改革後，按揭才開始普遍，整個社會和金融體系都沒有經歷過負資產的洗禮。如果樓市爆煲會如何，真的難以想像。
黃尹華
http://www.fb.com/decodepolicy
本欄逢周二、四刊出
黃尹華
國策透視 - 習進錢/黃尹華 舊文
來源 source: http://hk.apple.nextmedia.com
