金手指：
積極不幹預回歸了
■來屆立法會議員強推任何政策，遇到的反對聲音或大到你唔信。 資料圖片
親愛的AO和準議員們：
選舉有結果，孫柏文對你哋得一個忠告，就係呢四年，除積極不幹預外，真係唔好試其他嘢，唔好諗住仲想攞「政績」。
點解？首先唔講機械票，因立法會休會休足四年，機械票選民會
唔care照投，所以齋安撫其他票就得。而非機械票今次可被雷動計劃鬱得咁緊要嘅最核心原因，就係反對派議員功能個個一樣！因選民只係希望阻住政府做嘢！選民要議員守住議事規則，最好拉布拉足四年。
你，例如朱凱廸、劉小麗，可能話：「有民意認受，仲唔發揮左膠力？」如攞朱劉做例子，朱凱廸最出名就係阻政府，阻拆嘢、阻起嘢，而劉喺網上最高收視段片，都係一開始問建制派候選人，點解支持三跑、高鐵。做「有得傾」嘅左膠，支持度會跌得快過雷曼喺2008年嘅股價，唔信問嚇工黨。結構上，𠵱家每次政府行使威迫權，永遠都係大陸人受惠，香港人找數。由證監拉沽空機構、全民退保、三跑高鐵、連醫委會改革都被定為「益大陸醫生、醫學院」。「確認書」後非機械票選民已杯弓蛇影、草木皆兵咁唔信啲AO，任何出台政策為「明益大陸人，我哋找數」，我都只係苦口婆心勸你哋為自己重返積極不幹預。推任何強迫嘢，反彈大到你玩完。
英國人當年積極不幹預，唔係因皇恩浩蕩想賜經濟奇蹟，而係冇民主認受下，點維持政治控制權。不過培訓為技術員嘅你又點會明工程師嘅原意？祝你們好運，天佑香港。 孫柏文上
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
