金融High Tea 2016年9月6日
新地炒加股息
2016年09月06日
美國就業數據反映9月份加息機會唔高，股民繼續炒住先，港股一度爆升四百點，收市雖然略為回落，但仍創今年高位。
上星期就業數據冷卻左呢個月加息嘅機會，聯邦基金利率期貨的價格顯示，聯儲局9月加息的概率從出報告之前的27%，最後降至12%。
立會選舉結果推升地產股
美國9月份加息機會係低左，但可能無期貨顯示咁低，但股民炒股係講感覺，總之郁左先算，美股聞數據彈升，三大指數升幅都係0.4%，亦唔算好高，相比港股升幅反而更大，顯示資金對亞洲市場興趣大左。
大家估唔加息，地產股自然受惠。新地(016) 一馬當先升4.7%，造117.1元；長實地產(1113) 升2.3%，造56元；信置(083) 升3.6%，造13.66元；新世界(017) 升2.87%，終於攻破10元關口，收報10.04元；恒地(012) 漲2.49%，造46.05元。
有中環茶友口痕講笑，話呢次立法會選舉，專搞環保反對開發土地起樓嘅土地正義聯盟代表朱凱迪攞左8萬幾票做左票王，將來政府想搶地起樓都無咁易，可能呢個因素推升樓價，仲勁過美國唔加息。
新地股價咁勇，同佢呢排有樓賣同今個星期四會派半年成績表有關。近日一手熱愈燒愈旺，3個焦點新盤日前共沽逾千伙，其中新地發展的元朗Grand YOHO，日前沽清次輪單位，發展商再加推113伙應市。呢個盤本來賣得唔平，加價後更加係好價，新地食正呢個檔期高價出貨，點都對股價有利。
對小股東更實際的是新地公佈業績時，會唔會有良好派送。年初新地插到80元邊，大股東郭氏家族密密增持。
有大行估佢會對股東好啲，美銀美林就認為，新地核心盈利可按年升26%至250億元，每股盈利預測8.66元，下半財年更多項目入帳，包括東環I、II、天晉IIIA、天鑄2期。
騰訊一隻頂高94點
該行仲估計，新地物業銷售收入按年可升1.44倍至430億元，料其每股末期息2.75元，相當於全年72%，或者仲有潛在驚喜，估計全年每股派4.3元，咁等於按年升28%。
不過如果照呢個估計睇，該行都係睇120元，相當於股價對每股資產淨值折讓40%，照呢個目標價推算，o依家117.1元，都差唔遠，應該係逐步食胡，而唔係高位仲追貨。
地產股靚仔外，個市仲有最大功臣騰訊(700) 。恒生指數高開後，午後升幅一度擴大至422點，高見23688點，收報23649點，急漲382點，幅度有1.65%，比美股明顯優勝；國企指數收報9830點，上揚143點，成交金額769億元。
藍籌股最勁係騰訊，佢再破頂創上市新高，一度高見210.6元，升4.16%，收造210.2元，成為港股升幅最大功臣，貢獻恒指94點升幅。其他科網股都有表現，金山軟件(3888) 也升1.6%，中軟國際(354) 升1.9%。
個別細價股被炒起，中國智慧能源(1004) 炒高24.14%，造0.54元；納入恒生綜合大中型股指數的百靈達國際(2326) ，股價上周五狂升後，昨日再度爆上，收造0.56元，急升21.74%；星美文化(2366) 彈20.69%，造0.7元。睇嚟個市升得咁上下，熱錢又搵啲嘢炒吓。
陸羽仁
金融High Tea 舊文
來源 source: http://hdfin.stheadline.com
