港交所「吹水」
2016年09月21日
港股呢排焦點，開始由外圍轉向內地，主要係近日北水持續來港，資金由買高息股轉向中資股。內地A股昨日雖然變動唔大，但輪到深港通概念股午後大漲，浙江世寶漲停，山東墨龍漲逾8%，新華製藥、海信科龍等A股漲幅居前。
自從8月份一度爆炒深港通後，再加上
內地保險資金可以來港，令市場對中資股興趣由低點回升。呢幾日個市開始翻炒10月底深港通就開測試，A股炒作吓兩地掛牌嘅股份。香港嘅H股反應就相對溫和，山東墨龍(568) 收報3.49元，升左1.75%，幅度遠低過內地，原因相信係本地投資者經過滬港通後，對深港通唔會太亢奮。
李小加大力加鞭
呢排港股通使用額度增多，前日錄得的55億元人民幣，係歷來第四多，昨日使用額度有40%，8月初以來持續出現淨流入，港交所(388) 行政總裁李小加就走出來猛力加鞭，指中港股市互聯互通不設總額度令北水南下增加，仲話深港通將於下月底進行測試，現時準備工作進度符合預期。
雖然短炒爆炸力唔算好大，但北水慢慢流入，就令到中資股扭轉左年中嘅弱勢，表現比大市稍強。雖然前日港股升左兩百幾點，早段曾跌過百點後回穩，結果全日只跌19點，
恒指收報23530點，跌19點；國企指數就微升，收報9751點，漲3點，成交金額604億元，成交唔多。中資股板塊輪流炒，傳聞鞍鋼集團和本鋼集團將是下個推動的兼併重組對象，雖然鞍鋼集團旗下的鞍鋼(347) 話唔知情，股價仍揚3.3%，造4.04元；馬鋼(323) 升2%，造1.86元；重慶鋼鐵(1053) 彈升4%，報2.39元；首長國際(697) 升近5%，報0.241元。
宣佈左以換股方式收購中國高速傳動(658) 的豐盛控股(607) ，全日收造4.52元，跌0.88%。以換股方式的收購對象中傳動午後也捱沽，收造7.42元，挫5.6%。野村將中傳動評級由「中性」降至「沽售」，目標價維持6.86元，並稱豐盛現時估值過高，建議趁中傳動股價抽升沽售而不等交易成事時轉換豐盛股份。
內地炒作「金九銀十」內房賣樓，雖然不同地方開始收緊房策，但內房股表現仍然唔錯。建滔化工(148) 兼做嘅地產開始進入收成期同增加派息下，股價長升長有，比一年前低位差不多升左成倍。
建滔半年升一倍
建滔化工及旗下嘅建滔積層板(1888) 早前宣佈中期派息分別大增50%及1.1倍，帶動績後股價雙雙造好，其中建滔積層板更大升逾10%。建滔積層板主席張國華解釋過，上半年派息大幅增加，主要由於資金充裕及負債比率低至7%。展望下半年負債比率會進一步減少。宣佈之時建滔化工收報16.8元，呢個星期已升至22.65元；建滔積層板由5.85元，升至6.67元。
截至6月底止中期，建滔化工純利15.06億元，升71%；建滔積層板純利為8.4億元，按年升35%。雖然派息建滔積層板加得勁啲，但阿媽建滔化工嘅地產業務係新動力，加上有磚頭喺手，所以就算加派息無咁多，都一樣有心有力。
陸羽仁
金融High Tea 舊文
來源 source: http://hdfin.stheadline.com
