財路：中廣核行運一條龍
■中廣核受惠國策及母企實力，值得憧憬。圖中為集團董事長張善明。 資料圖片
中廣核電力（1816）頭三季內嘅數據同成績單靚仔，作為內地核電龍頭，預測PE又比內地行家平大截，好抵搞！
中廣核2014年上市，以發電總裝機容量計，係內地核電龍頭，對口中國廣核集團，由國資
委監管，係超級大孖沙級數。
而場內對內地經濟悲觀，加埋上年全國用電數據麻麻，大部份電力股插到開巷，中廣核亦唔例外，現價2.3元，貼近上市以嚟海底價，比上市價2.78元潛水。
但咁睇，中廣核啱啱公佈無耐，今年頭三季上網電量，同比增加咗31%。又集團今年上半年，盈利增長3.4%，到36億元（人仔．下同），若果扣除滙兌損益淨額因素，上半年盈利38億元，係增長咗35.6%，成績靚仔到痹。
另外，內地未來10年，每年會新建6個核電站，但連埋呢批新核電廠在內，到時核電所佔全國總發電量，都只係得10%，遠遠比南韓核電佔當地總發電量30%，同埋美國20%嘅比重少。
而喺內地明確環保潔能呢個重中之中國策下，加埋阿媽實力強大，中廣核又有獲注資推動增長concept，嚟緊日子，大把運行。
場內專業評估，中廣核今、明兩年EPS0.186港元同0.2港元，明年預測11.6倍PE。內地核電近磅瓣數，中核科技（深000777）明年預測80倍PE、南風股份（深300004）40倍、台海核電（深002366）29倍，中國核電（滬601985）近24倍PE，中廣核PE平霸。
買中廣核，當明年預測PE，上番上市以嚟歷史平均15倍PE，現價要升近30%，到近3港元，中廣核都未有耐追到最近磅嘅中國核電。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com
