中環在線：周六福開張又delay
■周六福圍板都未拆，已有人送發財樹賀開張。 方楚茵攝
香港旅遊業警號響唔停，內地金舖竟然銳意攻港，前有老鳳祥，近期就有名字似曾相識嘅「周六福」來港開業。周六
福第一間分店仲要開喺油麻地彌敦道，向對面嘅周大福（1929）挑機。奈何佢開幕日期不停delay，噚日華華走去八卦，內部裝修仲係如火如荼。
自由行去到冇乜威力，周六福先至話勇闖香港，大家其實應該畀啲鼓勵佢，但佢間舖原本係威係勢傳要喺10月黃金周開，之後卻一拖再拖。最新消息話公司諗住25號開業，即係今日。
內地媒體老作話旺場
華華噚日落舖睇，裝修師傅笑曬口話冇可能，佢仲指一指個假天花板，話電燈線仲拉緊咋，睇真啲，入面連首飾櫃都冇個，唔似今日可以開業喎。
不過有人已經安排花店送上蘭花、發財樹，綁曬紅絲帶，明顯係賀開張。周六福派咗個廣東話口音唔係好正嘅女士落樓收貨，可惜佢收完快閃。
講番周六福，公司早喺2004年已經在港註冊，但一直冇喺香港開分店。公司老闆叫李偉柱，大家未必識，但佢都幾鍾意曝光，近期已經頻頻喺內地接受訪問，講來港開店一事，仲有內地媒體自行創作，話分店喺國慶期間開咗，場面好火爆㖭，周六福開舖呢件事真係好神奇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
