金手指 - 孫柏文 2016年10月25日
金手指：買狂人贏超值博
■賭特朗普贏賠率高，好抵博。 資料圖片
上周末，孫柏文約咗個喺花旗國某大報論壇版做嘢嘅朋友飲茶。佢雖然非常仇恨希拉莉，覺得佢為咗錢，不但可以出賣原則，連國家安全都可放棄，好支持兼希望特朗普贏。不過，當我問佢：「妳覺得邊個會贏？」佢都話特朗普冇機，因太多侮辱女性嘅消息傳出。
嗰刻，我都唔想大香港主義上身，不過我就話：「妳仲係用緊傳統量度方法去睇選情。記得英國脫歐共投之前幾日，有個留歐中堅工黨國會議員被殺，全世界聰明人都話脫歐一定無望。點知……再講，特朗普唔係代表改變，啲人覺得佢係燃燒彈，不過咁啱，選民覺得成個建制已成疫區，不但冇得救，仲要不斷傳播。所以已準備將成個建設燒毀，重新來過。」
今日要同大家講呢件事，係因喺英國公投前，啲「應該知發生乜事」嘅人，完全把錯脈。香港立法會選舉都係一樣，爆冷爆到七彩。即係睇資產價格、博彩賠率等，特朗普勝算嚴重被低估。多唔好講，如果特朗普贏，喺勝利演說話因量寬反聯儲局，你估美元同全球所有資產會點鬱？
仲有十幾日就美國大選，我誠心建議大家要將所有流通量欠佳嘅資產放出去套現先。因你冇理由已忘記6月脫歐公投嗰日有幾刺激，不過更緊要係，如果特朗普贏，令美元升幅有英磅跌幅咁緊要，聯儲局仲要唔敢出聲，甚至想用跌市幫特朗普「助興」而唔出來救市，大家好自為知。最後同脫歐公投一樣，講投注額，希拉莉多，不過論投注人數，特朗普贏成條街。賭博公司為特朗普贏，現報四倍半賠率，超超超值博。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
