笑到最後：
泊車仲艱難過上車
■政府想將違例泊車罰款加價，卻不針對源頭多建車位。 資料圖片
舊年政府建議違例泊車罰款加到480蚊，引起譁然，最後調動議程擱置咗。今次政府終於講明，交通諮詢委員會主席郭琳廣話難以尋找土地興建泊車設備，再次建議增加違例泊車罰款。被稱為「梁粉」嘅郭琳廣貫徹
「先易後難」嘅懦夫施政方針，針對容易對付嘅小車主；官商鄉黑霸佔土地，搵地難，放生。
講真，泊街抄牌心甘命抵，但政府唔針對源頭起夠車位，揸車成為「先易後難」開刀對象條氣唔順。
翻查近期新盤，車位比例可謂慘不忍睹，除咗君柏呢類過千呎單位之外，其他上車新盤，每夥分唔夠0.2個住宅車位。市區交通較方便，車位少唔同佢拗住；偏偏新界路程遙遠最需要私家車，車位更少。
以往殖民年代，新界因為偏遠，屋苑會起較多車位，標位亦都較多以平衡車位租金壓力。隨住社會越嚟越富有，買車已經係好平民化嘅必需品。一個新界500呎單位都過500萬蚊，業主拎三幾十萬買車變得更合理，幾萬蚊買二手車唔算係乜，搵食車更加唔再講。社會發展，政府應滿足市民買車需要，車位應越起越多，再諗辦法減低塞車。
可惜鐵路優先之下，連新界車位都被挾高至過百萬，點解咁貴？因為規則署有規定，私樓「通用泊車標準」，每夥只得0.11至0.17個車位，本身已少得可憐，地鐵範圍500米仲要打75折，最少一夥得0.08個車位。
郭琳廣又話，長遠要考慮減少車輛數目。何不由佢個Boss梁振英開始？按上述準則，梁振英住中環禮賓府，同最近嘅中環地鐵站只係約500米7分鐘腳程，梁振英又可唔可以交還坐駕，以後坐地鐵返政總？小業主用畢生積儲買個新界上車盤，晉身私樓業主，買架車返工好合理，但喺政府施政方針入面，都係屬於唔適合買車嘅窮人，唔安份坐港鐵（066），就要捱貴車位租金或食牛肉乾。點解香港冇上流？因為買架車過車主癮，都係香港政府「先易後難」嘅針對目標。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
