財路：中國中藥買定等升
■中國中藥現價處調整階段，可收集定等下波升浪。公司網頁
中國中藥（570）食住國策，加埋新購中藥配方顆粒瓣數，預測PE得11倍，趁股價家陣仲喺盤整階段，好收集，等下波爆升。
中國中藥上年完成收購主打中藥配方顆粒藥企「天江藥業」。
天江係獲藥監局批准從事中藥配方顆粒
藥企之一，內地暫時得5家企業持有6張生產許可證，天江係其一。都市人講方便，顆粒藥啱曬要求。據統計，呢瓣總體會以30%年增長，到2018年時，市場規模會去到188億元人仔。
天江本身亦有包括同醫院直銷，慳番當中代理費，毛利率更靚仔。中國中藥啱呢個半年度受惠收購，營業額直接提升，呢期毛利率同比亦提高咗5.7個百分點，到52.8%。
另外，中國中藥上年以配股方式集資買天江業務，最新半年度配股攤薄全面反映，就算係咁，集團EPS係講緊增長36%，去到0.13元（港元．下同）。
中國中藥今年全年EPS起個孖，到0.26元，明年keep住30%增長，EPS0.34元，現價3.92元明年預測11.5倍PE。
中國中藥由2009年開始變身藥業股以嚟嘅平均PE，講緊28.7倍，明年預測PE，比呢個歷史平均值，平咗半有多！
又單計10月以嚟大行所畀目標價，拉平均，講緊5.2元，中國中藥上到呢個位，現價講緊要升33%，目標價嘅明年預測PE，得15倍PE，未有耐上番本身歷史平均值。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com
