財經評論：國壽保險暗藏殺機
中國銀聯落閘，一眾豪氣大媽大叔，再難碌爆張卡買保險走資，專注表叔生意嘅保險公司保誠（2378）、友邦（1299）當然受影響，香港保險界一哥、阿
爺旗下嘅國壽海外，睇落安然無恙，實際暗藏危機。
國壽海外進入香港市場多年，一直用特別嘅宣傳方式賣廣告，例如開地舖、聘請大媽做代理、派傳單等等，好似有啲老土，不過你唔好理，佢已經連續三年壽險之冠。
係咪因為大媽生產力特別強勁？翻開保監處上半年數據，代理渠道只佔總保費4%，大媽只係國壽海外嘅一條毛。反而銀行渠道佔比高達八成，唔講唔知，中銀香港（2388）、東亞銀行（023）、工銀亞洲等7間銀行，都有賣國壽海外嘅保險產品。
如果用貨幣計，國壽海外三分之二嘅單都係用港元計價，而通常只係得港人先會用港元買單。至於表叔喜愛嘅美元單，就佔國壽海外三分之一；而近年貶值到阿爺都唔認得嘅人民幣，佔比已經接近零。
再睇深一層，大家會發覺國壽海外相當本土，你覺得佢哋做表叔生意特別勁？Sorry，表叔鍾意高端洋氣上檔次的保誠，同埋金融海嘯前AIG持有的友邦，都唔鍾意國貨，國壽海外四分之三嘅客，都係香港自己人，淨番嘅先係表叔客。
睇到呢度，大家會發覺，國壽海外嘅成功，係香港人創造出嚟，因為香港人最重視嘅錢字，呢間國字頭完全滿足到。國壽海外旗下嘅保險產品回報，成日唔知點解會特別高。留意番，國壽海外上半年賣嘅單，97%屬於5年期內嘅壽險保單，對比保誠、友邦等比較專注於5年至10年，甚至係25年以上年期嘅保單，可以話係幾急功近利。
短期保單保障成份唔多，如果投保人不幸身故，通常只係賠101%至105%，即係買100蚊，身故之後都係100蚊畀多5雞你。不過呢類保險產品派息非常高，例如港元計價嘅「2pay5」保單，供兩年派五年息，每年都有3厘以上，贏曬唔少保險公司，亦好過擺喺銀行無息收。
點解會咁高息？舉個例子，假如你買5年期保險產品，又想賺比其他保險公司產品更高嘅息，保險公司就會拎你嘅錢，投資年期更長嘅產品，理論上年期越長，息率越高，國壽海外投資年期幾可肯定長過其他，但大家有無諗過5年後，邊有咁多流動性還返畀你？所謂短債長投，資產錯配，隨時PK。
畀大家參考番，今年3月中保監出咗個通知，規管中短期人身保險，中國人壽（2628）都有唔少產品受影響，短至1年以內要立即停售，3年以內嘅要逐漸減產，而呢啲產品回報5厘至8.5厘都有。再到今年8月，《財新》指中保監擬再出招，息率高於3.45厘的年金產品，要報送中保監審批，保險產品保險期不得短於5年；今年11月中保監主席項俊波更明言「保險姓保」，唔係大股東嘅融資平台或提款機。
連中保監都say no嘅短期產品，投保人又有無問過，同一屋簷下嘅國壽海外，佢哋投資項目係乜？有無詳細披露過？投保人嘅錢又會唔會好似去年內地股災咁要被迫「為國接盤」？只係睇利息唔睇保險公司本質嘅投保人，又識唔識驚？
可惜嘅係，香港保監處無提供香港保險公司嘅財政實力、投資組合等數據或資料，連保險公司會唔會PK嘅償付能力充足比率等重大指標，都唔見有相關披露，透明度不足，唔多符合香港金融穩建呢個大前提，只能夠說，買國壽海外保單嘅人，祝君好運。
記者：周家誠
財經評論 舊文
來源 source: http://hk.apple.nextmedia.com
