地產股應跌還需跌
2016年11月08日
港股重開，政治消息方面大家關心的當然係人大釋法，但呢個消息暫時睇唔到會對投資有乜影響。股市焦點所以仲係上星期收市後政府重手加辣，將第二個物業徵收的買家印花稅劃一為15%。
呢吓重手辣招一出，大家唔止驚樓市會跌，仲驚波及股市。恒指昨日開市後
不跌反升，雖然係咁，地產股就插得幾應吓，但美國傳出聯邦調查局停止調查希拉莉電郵門醜聞，令港股開市前杜指期貨大升180點以上，令港股有一定支持。
港股昨日開市就升咗40點，不過亦有中環茶友唱淡，話希拉莉同特朗普仲係叮噹馬頭，唔係有絕對優勢，美國好友使唔使咁興奮提早祝捷先？況且講到底，樓市對香港人而言，點都貼身過美國大選啩！所以港股唔跟美股大升好正常。
地產股跌幅幾甘
昨日人仔匯價又軟軟哋，中間價跌成211點子，跌幅係兩個星期內最大，呢樣嘢照計都對本地氣氛有啲影響。港股本來市底唔係咁強，所以陸羽仁覺得都係要小心啲，認為高追有風險。
有人甚至認為有大戶托住指數，可能係唔想股市急跌，令被辣招打窒的樓市氣氛進一步轉差，減低對地產市道帶來的震盪。政府出咗辣招後，券商都跳出來唱淡樓市，花旗就估明年底樓價會累跌15%，大家咁驚青，或者地產大戶就有需要出嚟維穩，先頂一陣等情緒穩定番啲先算。
結果恒生指數隨外圍股市上升，早段升勢一度放緩，滙控(005) 於中午休市時段交出符合市場預期季績，午後有資金追入滙控，拉動大市攀升，恒指午後曾升225點，高見22867點，但於10天線(22999點)遇阻力，收市前升幅收窄。恒指收報22801點，上漲158點或0.7%；國企指數收報9608點，升116點或1.23%，成交金額604.27億元。
地產股係重災區，好似新鴻基地產(016) 就跌9.9%，收104元，地產股之前升得太多，如今可以話應跌還須跌。
滙控為恒指貢獻70點升幅，為大市午後主要上升動力，滙控升2.96%，報59.15元。
滙控(005) 公佈截至9月底止第三季度業績，期內列帳基準除稅前利潤為8.43億(美元，下同)，按年大跌86%，遠遜市場預期中位數24.48億元。第三季經調整除稅前利潤則為55.91億美元，按年升7%。如果單計股東應佔盈利，第三季盈轉虧蝕2億美元。
中環茶友聽見今次大力加辣，好多都呻到樹葉都落，抱怨政府呢次加辣，靠地產搵食者固然罵聲四起，周邊相關行業好似廣告、零售都話擔心負財富效應有影響。由於外界反應都幾強烈。中環茶友話，睇呢兩日負責官員似乎都有小小驚青，急急跳出嚟解畫，強調呢排住宅升勢都幾急，有需要盡早出招。
出辣招係食毒藥杜老虎
O依家官員心情睇嚟都幾矛盾，如果重招無效，樓價續升，咁固然大鑊，勁辣招數若然收效，但搞到成個市差晒，咁付出代價太大，佢哋都驚畀人鬧。最差情況係，加咗辣招稅，結果有銀人士繼續掃樓，但「掹掹緊」的用家就中到正上唔到車。雖然官員話加稅唔影響首置用家啫，但O依家好多父母都想幫子女買樓，又想落番自己個名攞番啲保障，咁O依家就頭痕啦。樓價癲升成為政府死敵，茶友話，加稅猶如「食毒藥杜老虎」，兩敗俱傷，係霸道而唔係王道招數。
陸羽仁對於官員處境都有啲同情，O依家外圍樓市已經紛紛加咗辣，內地都連接出招，香港唔做嘢，肯定會變咗買樓天堂。早前內地資金紛紛湧落香港買保險、買物業保值，猛碌銀聯卡，呢種現象畀人寫晒出嚟，當時我已經話打擊碌卡買保險後，下一浪輪到買樓，點知內地未出手，港府已經先頂唔順要出招。聰明人話，悶聲發大財，樓市升到咁開巷，你話有心問鼎特首者點會忍得佢住先？
陸羽仁
金融High Tea 舊文
來源 source: http://hdfin.stheadline.com
