女神tea time：超蓮入局的啟示
■超蓮入得澳門勵駿，冇理由冇後著嘅。 資料圖片
賭王三房千金何超蓮，頻頻曝光娛樂版，最近又傳出同方力申撻著，事件係幾峰迴路轉嘅。抱住八掛心態入去IG，見到一張佢戴地盤安全帽自拍，Google嚇，原來佢飛去澳洲公幹，千金都要落地盤？
即係咁，富二代其實真係要返工嘅，而且叫得你落場，即係應該有啲重要嘢係冇佢決定就去唔到馬！
抱住呢個信念再睇通告，三太陳婉珍有份的澳門勵駿（1680），今年9月初新鮮滾熱辣，委任何超蓮任非執行董事，簽約三年。無啦啦委任寶貝女入去，冇理由冇後著嘅，此乃其一。
其二係超蓮入局後，公司9月底公佈，賣走澳門友誼大馬路酒店、賭場綜合物業套現，雖然原先個買方傾唔成，但同時又有新潛在買家傾緊，相信呢位潛在新刁應該會有驚喜，事關冇幾耐股價更上一層樓。
好啦，你話呢啲論點你覺得未夠喉，咁加埋宏觀大環境又點睇？澳門賭收10月升8.8%，創29個月最勁，賭股已經見底重回正軌，呢個時候更加應該先落注賭股；咁11月澳門格蘭披治大賽開鑼，勵駿旗下漁人碼頭咁近賽道，自然漁人得利。
再講多次超蓮，佢入局前後日子，勵駿開始加大回購力度，8月底至9月初大手回購近1,900萬股，均價大約都係1.1元水平。之後9月中股價開始爆升，所以估計1.1、1.2元會係支持位。睇走勢，股價每次穿50日線都會反彈，現時股價啱啱穿咗50日線，係時候捕捉反彈時機。
Fifi
http://fb.com/lovefrystock
本欄逢周五刊出
Fifi
女神tea time - Fifi 舊文
來源 source: http://hk.apple.nextmedia.com
