金手指：
我好「慘」我唔夠食
■上個月印度政府為咗打貪，將面值500盧比的鈔票作廢。 資料圖片
2003年，港股因多種因素，價格出現悲劇式跌幅。如果股價反映未來，2003年就係反映一個世界末日嘅未來。聖經嘅《啟示錄》講過話世界末日之時，將會有四騎士出現，瘟疫、戰爭、死亡、饑荒。
投
資者喺嗰個價都肯賣，因當年有SARS。瘟疫，中。中東美軍攻打伊拉克，戰爭，中。張國榮自殺，死亡，都中。點知，世界冇饑荒，四騎士得三。即係點？即係世界唔係末日，如果股價反映世界末日，即跌凸咗囉！仲唔係瞓身買貨之時？今日講番當年，係之後十幾年，我諗都好難再會有世界末日。因為齋睇香港啲大報港聞新聞，久不久就會有啲「我好慘、我唔夠食」嘅報道。我每次見到都好開心，原因係喺稿隔籬影住慘主嘅相，一定係個醫學上可被界定為obese嘅人。
點解開心？港聞啲左膠記者，出盡力做啲咁嘅fake news都只係搵到個肥人講唔夠食，香港肯定天下太平。而喺呢個自由市場主導、資訊流通嘅世界，應該都好難再見聖經悲劇式嘅大規模饑荒。
不過，去到今日，我唔係好肯定。上個月印度政府為咗打貪，用咗招連強如中共都唔敢用嘅招數，就係將佔流通量好大嘅鈔票，作廢。委內瑞拉，一個石油推動嘅社會主義天堂亦都係。我睇當地嘅消息，覺得兩個地方都將會因經濟嚴重扭曲、窮人僅存嘅餅乾罐儲蓄都冇埋，爆發大規模饑荒。希望我錯。
鈔票作廢，左膠同權貴會覺得站在道德最高地，好型。死，一定係窮人。唔信啲左膠會係咁？你咪問嚇推個肥人喊餓都話「慘」嘅記者，支唔支持面值大嘅鈔票作廢？
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
