港股虛不受補
2016年12月13日
美股創新高，但港股就無運行。候任美國總統特朗普挑機，話如果喺貿易問題上中國唔讓步，咁就要重新考慮吓「一中原則」仲係咪有效，內地嘅《環球時報》不甘示弱，反擊特朗普係外交新仔，唔知玩火有幾危險，內地已經預備左彈藥奉陪到底，同佢一齊坐吓過山車。
特朗普以政治素人嘅身份上場，就好
似隻蠻牛闖入左古玩店，行左可能打爛隻「唐三彩」、行右打爛隻「雨過天青」，呢啲叫做新官上任三把火。呢個情況維持幾耐唔知，好似九七回歸後，董建華做左特首，佢堅持新政差唔多行左五年(不過樓市八萬五就早早收場)，到左第二任先開始扭軚搞少啲嘢。
特朗普係舊式人，佢上場想學打返台灣牌，亦都想使吓錢搞吓基建。不過，呢啲招數有幾多可以用得返就好難講。好似佢話內地係匯率操縱國，指中國壓低人民幣匯價作不公平競爭，呢樣嘢就有啲過時嘞，因為O依家人仔唔係驚升值，而係驚貶值，大家講係阿爺要托住人仔匯價，多過撳低人仔匯價。既然O依家特朗普咁講，我估阿爺會喺佢上任前，畀人仔下調多啲，到佢上任咪出啲力維穩，費事佢嘈到拆天。
A股死火推低國壽港交所
特朗普除左打吓中國牌，仲話要起多啲基建創造就業，不過起嘢都要錢O架，咁錢喺邊度嚟先，O依家美國政府仲未滅赤，若然仲要開大水喉使錢，咁美國點樣加息呢？呢個星期美國聯儲局就開會議息，大家都估佢會加息，要睇嘅係加完息之後嘅聲明，究竟係會點講，O依家市場風向多數係估耶倫會放吓鴿。從佢嘅言論，講過想容許通脹再升溫，藉以推動投資，佢形容咁樣係對經濟加壓。
喺特朗普勝出大選前，佢講過不滿聯儲局係咁放水，又話做左總統就會炒耶倫魷魚，勝選後有風聲佢會俾耶倫留到任期屆滿。如果特朗普想加大財政政策嘅力度，咁就必須使錢，咁都無理由想推高利息，估計耶倫係今個月加息後，未來唔會咁肯定幾時再加。
港股昨日急跌，除左話特朗普話要打中國牌，內地股市滑落都有關係。中證監上個星期警告要規範險資舉牌收購，以及IPO大提速，今滬深股市齊齊插水，過百A股跌停牌。上證指數全日收報3152點，跌79點跌2.5%。港股虛不受補，美國升佢唔升、內地跌佢又跌，恒指收報22433，急挫327點或1.4%；國企指數收報9699，跌168點或1.7%；成交金額777.1億元。內地股市唔爭氣，國壽(2628) 重挫跌左3.6%，收報21.4元；深港通食唔到胡，港交所(388) 下滑1.6%，收報189.6元。
特首梁振英放棄連任，但地產股無因此炒上，反而市場預期美國將加息下，本地地產股齊齊受壓，新地(016) 左跌2.5%，報102.6元；長實地產(1113) 仲跌夠3%，報51.3元；會德豐(020) 、恒地(012) 都跌2.3%。香港電視(1137) 威左一日後跌返18%，報收1.35元，差唔多打回原形。
南方通信中籤和味
呢排新股首掛紛紛報捷，南方通信(1617) 全日高收1.74元，較上市價1.02元，高71%，成交1.43億股。不計手續費每手4000股，帳面賺2880元，中籤者相當和味。南方通信主要為內地三大電訊商的光纜供應商。是次來港上市共發售2.8億股H股，其中10%公開發售獲13倍超購，由於超額冇咁多，分配比例唔差，而且股份只係以略高於招股範圍(0.92-1.1元)中間位定價，集資用於建設金壇工廠擴建計劃二期、發展或收購光纜生產價值鏈上游，以及研發多元新產品及設立實驗室等。由於升幅唔細，炒味幾濃，中籤者不妨睇住食胡。
陸羽仁
金融High Tea 舊文
來源 source: http://hdfin.stheadline.com
