中環在線：
鄧聲興去足200間行拜票
■鄧聲興
過去4年香港社會撕裂，就連搵錢至上嘅中環人都特別關注今屆特首選委選舉。金融服務界入面，大家除咗恭喜「金牌莊家」詹培忠個仔詹劍崙成為票王，亦畀個like靚仔股評人鄧聲興，佢今屆再度參選終於得咗。
鄧聲興現為君陽證券行政總裁，以香港股票
分析師協會主席身份參選。鄧聲興上屆參選只得109票而落敗，今次再接再厲，取得146票，相對最低得票嘅當選者余維強獲130票，鄧聲興叫做交到功課喇。
佢都話今次積極好多去拜票，至少去咗200間證券行，尤其係細證券行，𠵱家先知道香港有好多家庭式經營嘅細證券行，唔少經營幾十年，老闆70、80歲，加埋太太得兩個夥計。隨住市場監管要求增加、交易系統一路升級，呢類證券行確實越來越難經營，所以都想有人幫佢哋發聲，要求未來特首提出政策支援佢哋發展。
問到有冇特首心水，佢就話要聽過參選人嘅政綱先講，不過佢係金融服務界，對於熟悉金融界運作嘅鬍鬚曾，的確係會加多幾分咁話。
可惜，鄧聲興個friend康健國際（3886）創辦人曹貴子落敗，佢唔係參加金融或商界，而係去選演藝界。曹貴子既係醫生，又活躍於股壇，唔講唔知，佢近年投資電影，仲係香港影業協會名譽會長，失敬失敬。但佢選番金融界嘅贏面應該大啲囉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
