魚樂無窮：
三日後特別派彩
■明輝國際本周五將召開董事會；圖為集團主席程志輝。 資料圖片
政治一日都嫌長，就算忠心如梁振英，都隨時被中央DQ，立法會宣誓風波，令香港社會進一步撕裂，由坐定粒六變冧莊變成做family man，時也命也！股市比政治來去更快，被一男子玩殘嘅香港電視（1137
），上周五一度炒高五成，但噚日已經大幅回吐，以上周五平均成交價1.64元計，坐過夜即輸兩成，證明快錢都係辛苦錢，未能無時無刻睇實報價機嘅，呢啲錢唔輪到你贏。
明輝國際（3828）月初宣佈，本周五將召開董事會，以考慮建議及派發特別股息，心水清嘅戰友都記得，明輝今年8月出售上環新紀元廣場五單位及兩車位，套現2.6億銀，連同原有手頭淨現金逾3億銀，與最新市值不足10億銀比較，水浸及膝啦！
眼見公司管理層未作特別分派，第二大股東David Webb便發公開信，要求明輝派發特別息每股最少0.352元，否則會召開特別股東大會，委任董事入局，最後才促成本周五嘅董事會。
𠵱家博唔博得過？明輝處於五年高位，雖已部份反映特別派送嘅憧憬，但27厘息的確吸引，就算打個五折都抵，三日等派彩，試一試吧！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
