中環在線 - 李華華 2016年12月1日

中環在線 - 李華華 2016年12月1日


中環在線：滙豐擺彩獅撐性小眾
■團結之獅色彩繽紛，吸引遊人集郵。　黃耀興攝

滙豐銀行中環總行噚日相當熱鬧，面向皇後大道中嗰邊多咗兩隻彩色獅子，𠵱家共有6隻獅子鎮守，「獅子行」果然名不虛傳。

滙豐新擺兩隻彩色獅子，係要表示支持不同

性傾向及跨性別人士（LGBT），所以用上代表LGBT嘅彩虹顏色。呢對獅子1比1複製銅獅，用玻璃纖維製造，搵嚟LGBT藝術家林煒燊設計，塗上塑膠彩。張開口嗰隻名為自豪之獅，合口叫做團結之獅，花紋有分別。

雖然滙豐放兩隻彩色獅子喺總行原意十分好，但唔少中環口痕友見到就擰曬頭，講笑話擔心滙豐股票跌到「七彩」。風水師麥玲玲指，獅子有鎮宅、化煞作用，形象威猛，油上彩色卡通化就冇咁好，而且一般建築物只用一對獅子，擔心放太多有反效果。

講多無謂，睇股價圖最實際。滙豐總行舊年初為紀念150周年，喺皇後大道中放多一對石獅，呢對石獅係滙豐第三代總行頂層裝飾，係銀行珍藏文物，放咗之後股價舊年4月上過去77.45元高位。可惜之後一直滑落，今年4月跌落45.8元，直至8月滙控宣佈回購，先刺激股價上升，噚日收報61.05元。究竟6隻獅子幫唔幫到滙控股民，華華都好想知，而肯定嘅係，呢對彩獅只會擺到年底，之後就會收番埋。

李華華
mailto:LiWaWa@AppleDaily.com

■滙豐嘅彩色獅子，係要表示支持不同性傾向及跨性別人士（LGBT）。 ■麥玲玲師傅指，獅子有鎮宅、化煞作用。 ■𠵱家共有6隻獅子鎮守「獅子行」。

李華華
LiWaWa@AppleDaily.com
中環在線 - 李華華 舊文

來源 source: http://hk.apple.nextmedia.com