操盤手劄記：
婦女節吼胸圍股
■超盈戶包括Victoria"s Secret。 資料圖片
美國聯儲局下周二、三議息，利率期貨顯示，3月加息機會曾達100%！不過唔好忘記，下周三亦係美國債務上限到期，假如國會無法就提高或延長大限達成共識，政府就會再次陷入債務危機。雖然過往國會都會喺最
後關頭傾掂數，但今次嘅last minute係喺聯儲局發佈議息聲明之後，當政治局勢威脅到經濟，甚至政府要關門時，聯儲局係咪照加息呢？
美股高位整固，連跌兩日；港股本周卻見好友反攻，連升三日。恒指昨收23782，升101點或0.4%，但10天線跌穿20天線，出現「死亡交叉」，成交連續三日唔夠700億元，上衝力不足，後市或會再試上周五低位23511；若能重上20天線，則可解除「死亡交叉」威脅。
三八婦女節，諗起「女人股」，𥄫中超盈（2111）！超盈唔係四太個大女，係剛被納入港股通名單、又剛發盈喜嘅「胸圍股」。集團周二收市後預告2016年純利大增，將於本月20日派成績表，昨即趁婦女節發雌威，開市冇耐就抽高11.5%，收市仍升8.1%，報6.01元。
超盈主要產銷女性內衣物料，包括胸圍用嘅彈性布料、bra帶同喱士，仲有運動服裝物料。客戶包括Victoria"s Secret、馬莎、華歌爾、黛安芬、安莉芳等，相信唔少女士都識，甚至有過親密接觸。集團2014年5月上市，已連發4次盈喜。難怪女性內衣被《每個小三背後都有個黃臉婆》一書形容為「那是一種必須的奢侈性消費品」，女人果然係「市可跌，胸不可跌」！
集團東莞新廠房首季投產，產能可望增加15%；越南首間廠房亦將於年中投產，產能可望增加三成，並紓緩內地逐漸加重嘅生產成本。擴充產能後，有助拓展毛利率較高嘅喱士業務，帶動盈利增長。舊年12月，集團又夥拍7間內地企業搞保險，合營公司名為喜康人壽保險，喺內地從事保險業務及相關財務活動，註冊資本20億元人民幣，超盈持股7.02%。賺女人錢之餘，不忘鋪多條後路。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
