魚樂無窮：
心浮氣躁最累事
■打牌有時限性，加上銀碼可控，好多人輸錢當畀娛樂費。
「人品好，牌品自然好！」劉德華在十幾年前賀歲片《嚦咕嚦咕新年財》嘅經典對白，唔少人𠵱家都掛在口邊。其實重點在於梁詠琪之前那句對白︰「越爛嘅牌越要用心打。」當你手上副牌九唔搭八，自然會心浮氣躁，如果未能即時
調整心態，出沖輸大牌絕對唔奇。
打牌有時限性，加上銀碼可控，好多人輸錢當畀娛樂費。炒股就唔同，對手成千上萬，秒秒鐘幾十萬上落，順境波就一齊贏，市差可輸身家，所以股品一定要夠好，才能夠長玩長有，點樣先可以做到？幾個心法一定要知。
第一，賣仔莫摸頭。沽完繼續升或者買咗即刻跌乃家常便飯，與其望番轉頭怨天尤人，不如樂觀尋找下一個靚trade。
第二，手風差要忍。去過賭場嘅戰友一定明白，賭枱輸錢自然想追番，但心理質素不佳下，只會泥足深陷，越輸越甘。炒股亦然，勉強去收復失地，只會輸完一隻又一隻，老土講句，財不入急門。
第三，勿睇實報價。可能每一跳嘅差異很少，卻足以令你心緒不寧，繼而影響決定，記住，跟實太貼如果出事，最傷嘅永遠係自己。
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
