全球樓瘋炒起內房
2017年03月09日
世事如棋局局新，美國三月份加息之聲唔細，就算三月份唔加，遲啲都係會加，但唔知點解，全球樓市就好似好亢奮，連股神巴菲特都加把嘴叫人買樓。
今年係美國加息年，連帶全球另外兩大經濟體系歐洲同中國，應該都會係收水多過放水，係咁環境下，巴菲特竟然跳出
來，話美國樓唔怕買，仲叫人做三十年定息按揭。股神做左美國經濟大好友，先前話美股有排升，仲話睇杜指十萬點，而家連樓都話買得過，不過就要做定息。
港樓值博率最低
美國經濟旺，睇好樓市唔奇，但中港兩地樓市，呢排都一樣好熱，大陸內房賣樓頭兩個月繼續好熱，公佈出嚟的銷售數字持續強勁，不過本地人感受更深，係港樓連加息都好似唔怕，嘉湖山莊呎價過左一萬元，成為地產版大新聞，連財政司司長陳茂波都叫人要定啲嚟。有中環茶友笑言，財爺咁講大家係會定啲抑或驚啲都好難講。
股神係加息前叫人做定息買樓，茶友解讀有兩個意義，一係美息會上，而且上升幅度可能唔會再細，所以借錢要鎖定利息成本。
二係佢睇經濟會熱、通脹會嚟，長遠有利房地產價格，扣除上升左要俾嘅利益都仲有着數。呢個亦係好多經濟學家講，特朗普嘅再膨脹政策嘞，按照呢個邏輯，佢就睇好樓市囉。
茶友一向係樓市嘅支持者，佢嘅理據係央行同政府鍾意做好人，成日印銀紙，咁有限供應嘅實物資產就成為得益者，所以樓價無得跌。
港樓癲價，先唔覺咁係咪有啲上帝要他瘋狂，必先要他滅亡的味道，但陸羽仁至少會覺得，無論買樓買股都要計吓風險值博率，如果計風險，股神叫買美國樓係風險最低，因為美國經濟夠強勁，而且聯儲局扼住美息扯高拉低嘅權力，可以控住樓市同經濟嘅風險，用同一個邏輯，大陸樓市風險可能高啲，但最高可能都係香港樓，因為香港經濟增長最慢，而且完全唔掌握利率話事權。所以，如果要癲炒地產股，都係炒內房股嘅值博率會好啲。
正係人同此心，市場資金流向都差唔多，借住話憧憬內地今年將加快去樓市庫存，內房股續續向好，而且擴散到一啲民企內房，好似係中港兩地都有項目嘅世貿房地產(813) ，單日就爆升10%，收12.56元，創一年高位。
世茂房地產日前公佈今年首兩月銷售成績佳，合約銷售額約52.3億元(人民幣，下同)， 按年增長1.5倍，合約銷售面積為340060平方米，平均銷售價格為每平方米15368 元，股價於是大追落後。世貿嚴格嚟講係二線公司，但佢地皮質素唔錯，而且呢兩年係香港執左唔少平地，加上之前係山頂買嘅豪宅，資產相當之豐厚。
資金落力追捧內房股下，其他好似雅居樂(3383) 升6.7%；遠洋集團(3377) 股價及相關新聞升5.5%，報4.22元；去年賣樓三甲嘅碧桂園(2007) 再爆升5.3%，報6.38元，你話係咪炒內房好炒港房股先？
大市氣氛都係向北望，恒指昨日收報23782，升左101點國企指數仍然略為跑贏，收報10280，漲50點，成交金額690億元。市傳聯通(762) 將進行混改，更有機會引入騰訊或阿里巴巴，聯通周三收報9.58元，升2.13%。
此外，經過歷時五年的調查後，中興通訊(763) 終與美國監管部門達成和解協議，需要支付高達12億美元罰款，該股周三升6%，報12.94元。
陸羽仁
金融High Tea 舊文
來源 source: http://hdfin.stheadline.com
