炒落後 好和味
2017年03月14日
美國本周議息，但港股上個星期調整，呢個星期開市造好，似乎有小小偷步炒加息短期壓力快將過去的味道。向好板塊中，內房股輪流炒，呢期輪到內地賣樓一哥恒大(3333) 接連炒上。恒大去年賣樓3700億元人仔，首度壓過受股權爭拗嘅萬科(2202) 成
為賣樓一哥，但早前賣樓追緊上來的碧桂園(2007) 炒高，恒大好似無乜火氣，結果發力追落後。
恒大單日爆升10%
熟悉恒大情況的中環茶友講起，恒大在海南嘅重點項目海花島開售大賣，由於土地成本便宜，每個單位售價唔貴，加上北方消費者鍾情南方氣候宜人空氣好，所以銷售暢旺。恒大賣樓咁勁，股價係內房板塊啟動時雖然有升，但就跑輸大圍，主要係佢賣樓策略係薄利多銷，利潤率無國企內房賺咁多，邊際利潤率唔係咁好，加上負債偏高，所以一直炒吓上落，無大表現。
不過，早前同係賣樓打入三甲的碧桂園接連爆上，谷起內房股氣氛，而且恒大已經訂好左回歸A股嘅集資計劃，所以呢兩個交易日係咁追落後，佢收市報6.91元，單日爆升9.9%，買中真係相當和味。勁升後恒大市盈率有8倍樓上，到佢派成績後市盈率應會調低，但都係近年較高嘅估值，以去年派息計息率有6.5厘，大家都估恒大今年會否繼續派高息。
恒大將屬下的地產業務回歸A股，但香港仍會保留上市，變身為業績範圍較闊、包括銀行金融業嘅綜合企業，仍然係回歸A股地產企業的控股公司，呢個安排等如拆售地產公司股權集資，會增加左公司嘅資金，有助紓緩融資壓力。其他追落後嘅二、三線內房股，好多升幅都近一成，新城發展(1030) 一升就升15%，報2.35元；首創置業(2868) 升10%報3.87元；合生創展(754) 升9.8%報7.76元；富力(2777) 升9%報13.2元；中海宏洋(081) 升8.5%報3.94元。
但茶友講起內房股的總體形勢，話今年內房股要籌資，除了賣樓外，因為債市回落，較難發債集資，呢個因素不能忽視。好似富力地產(2777) 昨日亦8.9%到13.2元，瑞信發表報告指，雖然上調富力目標價，由10元升至11.6元，但評級只係維持「中性」，話富力地產2016年全年派息每股1元人民幣，令集團股息率達9.3厘，是行業最高，去年核心盈利65億元人民幣，同比升9.1%，基本符預期，值得關注係佢毛利率下跌令人失望，仲認為淨負債比率升至177%，令人驚嚇，整體而這未見令資產負債表改善的具體方案，所以無提升佢嘅評級。
茶友話由此可見，大行認為民企內房股財政狀況值得關注，炒作之餘不能太過掉以輕心。我就話呢個亦可能係內房炒高的原因，整個板塊炒起，愈炒得高就愈易批股集資，未批前有得炒，批股時要睇路走。
中字股表現優勝
內房向好，同A股帶動都有啲關係，滬深兩市開盤急速下跌，但隨後逐漸上升，題材概念造好，帶動上證指數重上3200點以上。恒指開市造好，收報23829，升左261點；國企指數收報10258，漲189點，成交金額865億元。中字股表現優勝，內銀股表現出色，中國銀行(3988) 上揚3.2%，收報3.9元；工行(1398) 升3%，收報5.06元。
大市有唔少股份造出新高，一個靚仔板塊係科網股，入左深港通名單嘅美圖公司(1357) 股價停不了，午後高見12.88元，再創新高，收報12.52元，升近5%。華潤水泥(1313) 獲大行唱好，收報4.26元，升逾9%。公司2016年盈利13.26億元，升31％。每股基本盈利0.203元，派末期息7.5仙。瑞信重申對其「跑贏大市」評級，目標價維持5元；大華繼顯亦重申「買入」評級，目標價由4.5元升至5元，炒落後買中佢又係一日可以收割。
陸羽仁
金融High Tea 舊文
來源 source: http://hdfin.stheadline.com
