A股等回調吸納
2017年03月07日
內地召開人大政協兩會，總理李克強提出穩中求進的經濟方案，但不少人對於內地經濟大局，仍然有啲人抱住懷疑，擔心下行壓力未除，亦係咁令到中港股市暫時無力突破。
專家擔心彈完又落
內地過去幾個月數據偏穩，當中生產價格指數PPI走勢比較硬淨，內地網
媒《華爾街見聞》就搞左個專題，探討周期係見底抑或反彈見頂，有較樂觀嘅論者話「考慮到首季度信貸、新定單等先行指標超預期，經濟小周期復甦將至少持續到2季度。」不過，看淡者就直言不認為大陸會有一個「空中加油」嘅新上升周期，當中平安證券首席策略分析師魏偉嘅講法最搶眼球，佢話2016年三季度開始，中國經濟進入了中周期上升力量與短周期下行力量的交匯點，短周期的下行力量並沒有完全釋放。此外他還強調，商品價格最快速度的反彈已經結束，二季度大金屬價格波動將比較顯著，但看好小金屬價格。
對於大陸經濟係唔係反彈完結，再有機會下行，陸羽仁睇法覺得不完全係咁，但因為反彈運行左一段時間，未來幾個月有可能抖吓氣，回調一下但回調得多，阿爺好可能又會出手托吓，所以A股有機會反覆吓，但大格局應該都係反覆向上，如果回調得多，就可以吸吓安碩A50基金(2823) 呢類大陸指數股，等阿爺托住經濟時佢就有表現。
呢排縮水少左活動，港股成交減少無乜火，恒指全日變動唔大，收報23596，升43點；國企指數收報10171，漲26點，成交623億元。內銀股昨日表現唔錯。建行(939) 漲0.33%，收報6.17元；中國銀行(3988) 升0.53%，收報3.81元；工行(1398) 上漲0.41%，收報4.95元；恒生H股(2828) 受惠升左0.29%，收報102.4元；
恒生指數換馬，做左藍籌多年嘅利豐(494) 被踢走。有中環茶友過去好鍾意買被人剔走嘅藍籌，佢叫呢啲做墮落的天使。
呢類股份本身有一定實力，可惜時不予我被洶汰，係做藍籌嘅時間有基金會跟住成份股名單持貨，一旦被除名就會有沽售壓力，形成股價下插，茶友最鍾意買呢類股票，過去佢趁中煤能源(1898) 入貨賺左筆。呢次利豐除名，收市又升左3%，收報3.62元，大家自然有興趣知佢嘅策略。
茶友話，佢揀呢啲墮落天使都好小心，因為被人踢出嚟，唔多唔少有問題，所以佢會先秤吓身家，睇吓公司資產，然後先考慮前景。好似中煤出局，主要係煤炭業不景，加上佢同龍頭神華都係成份股，所以被人擯走，但內地倚賴煤炭作為能源嘅大格局短期好難改變，所以唔怕執平貨。而家睇番阿爺想用少啲煤，但方法係減少細礦生產，咁反而有利降低供應，令大型煤礦股反彈。
利豐落榜股東喊三聲
利豐情況有啲唔同，佢過去主要倚賴做中間人帶動嘅物流概念，加埋不斷以併購去催谷盈利，但係電子商貿不斷發展，佢嘅物流生意不斷被取代，失去魔法後的股價亦支持唔到後續併購，所以股價下滑，而家佢雖然經歷技術性拋售，股價遲啲或者會反彈，但因為公司股價仲係高過淨值2.3元，危險性未除，佢博反彈都要小心，一有唔妥就會走人。
利豐係陸羽仁過去長期叫大家小心嘅股份，睇番佢嘅股價係2011年初升破50元水平，創出歷史新高，之後開始回落，而家落榜跌剩幾個巴仙，高位入貨嘅股東真係要喊三聲。
係佢下插期間，唔少人問我好唔好兜底，我嘅忠告係呢類高估值、高市盈率嘅股票，必須有高增長支持，一旦失去增長，做值調低，跌幅可以好驚人，結果利豐業績持續倒退，估值滑落下，股價低處未算低，而家跌到市盈率9倍，息率有7厘，咁唔係佢股價吸引，而係基金唔睇好，沽到股價好殘，呢個再次證明，買高估值、低資產嘅公司真係要好小心、好小心！
陸羽仁
金融High Tea 舊文
來源 source: http://hdfin.stheadline.com
