美圖食正深港通效應
2017年03月08日
兩會開鑼，關於內地經濟嘅討論都多左，早前內地公佈採購經理指數PMI反彈，引起左外界注意，有人仲提出，話部份代表中國經濟增長的「克強指數」近期上漲至12%，創四年來的最高水準。可能多左呢類消息，內地A股都向好，帶動港股回升。
總理李克強過去
用左好多實體數據講經濟，《經濟學人》在2010年提出呢個概念，涵蓋耗電量、鐵路運輸量以及銀行貸款發放量，該刊認為，克強指數比中國官方的GDP資料能反映經濟現況。克強指數近日升上高位，外資細睇指數的組成部份，包括左幾樣嘢—關鍵大宗商品價格上升，水泥和鋼鐵在體量和價格上均上升明顯，重卡和挖掘機等機器銷售亦急升。對於以上情況，外資有不同解讀，德銀認為呢個係早兩年寬鬆周期的效果開始顯現，今年上半年國內需求預計會達到巔峰。
克強指數好轉減外資淡風
克強指數回升令到部份看淡的外資改變左小小睇法，瑞士信貸的策略師預計，今年中國非金融業的利潤可能會增長20%，遠高於當前市場估計的6.5%。雖然有部份外資仍然係唔信邪，好似滙豐控股亞洲經濟研究部門分析師就覺得，克強指數偏向反映傳統工業，指數回升只係顯示舊經濟捲土重來，呢啲舊經濟背後代表著不可持續的龐大債務，關鍵係可持續推動經濟發展的，係新經濟如消費係咪可以持續增長。
好似克強指數回升係咪代表左復甦呢類辯論，永遠唔會拗完，但拗還拗，就算呢個指標反映舊經濟多啲，都代表左內地佔一半的產值狀況，係中央加大扶持措施後，產生一定效果，都係好消息，令市場氣氛改善。
睇番內地嘅市，滬深三大指數都上揚，上證指數收報3242，升左8點，深證成指報10552，漲29點；創業板指報1977，升15點。兩會期間言論大部份都有利增強市場對中國經濟信心，支持埋港股向好，恒指收報23681，升84點；國企指數表現較佳，收報10229，漲58點，成交金額627億元。
舊經濟反彈，加上年初出嚟嘅賣樓數字仍然唔錯，市場憧憬市況續穩，內房股昨日普遍錄得升幅，中海宏洋、遠洋集團(3377) 齊齊爆升逾6%，呢排好勇嘅碧桂園(2007) 升5%，破關收報6.06元，再創今年新高，其他綠城中國(3900) 、雅居樂(3383) 、保利置業(119) 都升逾5%，大股萬科(2202) 升4%。睇嚟舊經濟股有機會逐瓣再炒吓。
舊經濟股或再逐瓣炒
同恒指相關嘅變動係深交所公佈，因恒生綜合大型股指數、中型股指數、小型股指數實施成份股定期調整，「港股通」股票名單亦作出調整，獲調入的股票包括美圖公司(1357) 、周黑鴨(1458) 、周生生(116) 及中信建投(6066) 。消息公佈下，香港有關嘅周生生無乜反映，內地相關嘅美圖股價創新高，爆升12%，報收11.28元；周黑鴨漲2%，收7.68元。美圖而家賺錢唔多，但掛牌後股價甚勇，貨源有啲歸邊感覺，由於佢係國內知度大，炒作科網股的概念特別大。
另外，美高域香港(1985) 新股上市，公開發售獲1176.8倍超額認購，呢間資訊科技基建解決方案供應商睇嚟好受觀迎，上市前夕暗盤價高開報1.7元後，愈升愈有，新報3.4元，比招股價1.46元，升左1.32倍。要睇佢今日正式掛牌後有無表現啦。
陸羽仁
金融High Tea 舊文
來源 source: http://hdfin.stheadline.com
