Money Walker：
買跌恒指新玩法
■恒指同國指嘅槓桿及反向產品即將在港推出。 李潤芳攝
恒指同國指嘅槓桿及反向產品即將在港推出，以後買跌恒指，又或者透過槓桿買升恒指，又多個選擇。
不過觀乎本港目前已上市嘅槓桿及反向產品（暫時全數只追蹤非本地指數，如美國、日本
、韓國或印度股市指數），交投一直極為疏落，唔少直頭零成交，令人懷疑恒指同國指嘅槓桿及反向產品，正式掛牌後會否步此後塵。
筆者認為對於風險承受程度低，但又有興趣利用槓桿或買跌獲利嘅投資者而言，槓桿及反向產品係一項唔錯嘅投資工具。可惜槓桿及反向產品在港面世9個月時間仍乏人問津，主要由於其每日結算性質令投資者卻步，而且個別產品追蹤誤差頗為嚴重。
在港掛牌嘅槓桿及反向產品回報其實唔差，總數13隻槓桿及反向產品中，有6隻亦即近半數，年初至今累計錄得正回報，當中更有3隻分別追蹤印度Nifty50指數、標普500指數及納斯達克100指數嘅兩倍槓桿產品，期內更取得雙位數字回報。
個別槓桿產品表現靚仔，全因槓桿產品本身性質係大升市時先會造好，Nifty50指數、標普500指數及納斯達克100指數，年初至今升幅介乎6%至9%，追蹤有關指數嘅槓桿產品期內自然有雙位數回報。
槓桿產品適合大升市時投資，反向產品則適合大跌市時投資，所以最適合涉足槓桿及反向產品嘅時間，就係升浪或跌浪開初，上落市期間則不宜沾手。問題係恒指及國指處於大升市或大跌市嘅時間不多，加上槓桿及反向產品每日結算嘅安排，導致呢類產品唔適合長揸。故即使槓桿及反向產品風險水平低於衍生工具，玩法亦較易為散戶所明白，但贏錢難度卻未必低得過牛熊證或窩輪。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
