金手指：一注獨贏沽加幣
■加拿大樓市出現嚴重泡沫，加幣兌美元應該冇運行。 互聯網
舊年六月，孫柏文寫咗篇「一注獨沽溫哥華樓」。十個月後回望，成功估頂，而到今日，我都企硬。唔好話溫哥華，多倫多及其他加拿大城市，亦出現嚴重泡沫。我呢啲由97年開始炒嘢嘅人，可以斬釘截鐵咁話，加國樓市係牛市三
期，即「非理性亢奮」，要完就一定係貨幣供應出現斷裂已造成。
牛市三期，一定係要有好多唔應該買樓嘅人買到樓，或者應該買一個單位嘅人買到第三個單位，先可能出現。而呢啲購買力不足嘅人，要用越來越「有創意」嘅借錢方法去買。而加拿大啱啱發生咗一件結束牛三、影響貨幣供應嘅事件。
咩事？就係加版次按提供者Home Capital Group被擠提，宣佈以超二十厘息借緊急資金。今次擠提唔難預見，因加拿大監管機構同香港一樣，都係覺得銀行非利息收入（例如賣雷曼迷債袋傭金）比普遍借貸生意，對銀行系統「安全啲」。不過唔同香港，加拿大銀行知道賣產品輸錢，啲客會靜坐幾年嗌「還錢、還錢、還錢」，所以早排，加國大銀行已停止賣HCG嘅儲蓄產品。
濫放貸商玩完，加埋天價，樓市爆破一觸即發。𠵱家問題係最嚴重會點，同點收科。我聽過最悲觀係加國五大銀行中，會有起碼一個就算唔變雷曼，都會變08年嘅花旗、美銀。我今日預測，加拿大央行將會喺三年內因要救市，開啟量化寬鬆印鈔。加幣兌美元應該冇運行，所以今日非常認真建議大家要將所有加拿大資產賣出，睇淡最易方法，就係一注獨沽加幣！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
