大棋局：美元料易強難弱
■特朗普久唔久出來話美元太強，只因唔想美元升得太急。 資料圖片
美國五大動作都會令美元強，減公司稅、抽一次性海外盈利稅、抽邊境稅、加息、縮減資產負債表。特朗普久唔久彈出嚟話美元太強，因上述五樣嘢做齊會令美元升得太急，所以撳一撳，而非要美元弱，
今日先談縮表問題。
貨幣政策有兩隻，一隻控價，一隻控量。控價即鬱利率，控量即印銀紙。利率係貨幣價格，利率高，貨幣值錢，銀根就緊；利率低，貨幣平，銀根就鬆。印銀紙印得多，錢賤物貴，就會通脹；印得少，錢貴物賤，就會通縮。對於資產價格嘅影響，後者的效果立竿見影。
嚟緊我哋不單止要面對美國加息，更要面對縮表。加息為控價，縮表為控量。聯儲局2014年9月發佈嘅《Policy Normalization Principles and Plans》早已講過，喺貨幣政策常態化道路上，會先加息後縮表。環境變動會令操作拖慢或延長，但大原則、大方向唔會變。
現時聯儲局資產負債表規模4.5萬億（美元，下同），按現時美國經濟狀況，2.5萬億係最適合。最正路嘅估計，聯儲局會先停止國債到期再投資部份。過去幾年QE，聯儲局買債後如債券到期，會將收番嚟嘅本金再買債，維持擴張性貨幣政策。停止再投資，即債券到期就收番本金唔再買嘢，效果等同收回基礎貨幣。
由於控量嘅貨幣政策效果更直接，所以明年或出現聯儲局縮表時暫緩加息，避免兩樣嘢一齊做令市場太動盪。美國收緊貨幣政策時，其他國家不能太鬆，否則自國貨幣會相對貶值。截至3月末，中國央行已靜靜雞縮表1.1萬億人民幣，目的當然係要習近平訪美時人民幣唔好太樣衰。但印銀紙係一種金融鴉片，唔上電唔掂。中國要跟美國縮表，內地樓市隨時反轉；唔跟，人民幣轉弱人哋就話你滙率操控。點解決？似乎權貴已用腳表態。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com
