智取大市：保持做好友的心態
■指數破頂，市場審慎，後市往往向上機會較大。 資料圖片
假期前恒指突破2015年港股大時代過後嘅高位，但目前市場對於港股後市睇法，好淡參半，氣氛一點亢奮都冇，原因係近期港股市寬極差，跌股多過升股，對投資者嚟講可以話係一個不可抗力嘅睇淡理由。
不過，回想接近一
年前，美股道指都係喺接近歷史高位附近，略低於18,000點，當時美股投資者情緒同目前港股投資者有接近之處，都係出奇地審慎，反映購買力遠遠未耗盡。睇淡者亦早已減持股票避險，要進一步拋售嘅貨源有限，跌極有譜。結果經歷英國脫歐、特朗普當選嘅消息之後，美股道指一支箭衝上去，現已累積3,000點升幅，仲似乎未見頂。
港股會否重覆類似劇本？畀多個近似Case例子各位，2013年底至2014年初，升勢一面倒傾斜於科網濠賭股，市寬同樣差，2014年第一季炒爆科網濠賭後，係咪代表港股就咁玩完？No，2014年第二季有滬港通，2015年第二季就進入港股大時代。
指數破頂，市場審慎，往往係一個向上嘅機會，多於向下嘅先兆。反正呢一刻只需要做科網股好友就已足夠，舊經濟股又未去到撈底時候，策略上冇乜需要調整。心態上，保持「好友底」先。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
