中環在線 - 李華華 2017年5月4日
中環在線：陳啟宗搵人寫恒隆史書
■陳啟宗喺網站大談恒隆60年來嘅歷程。 「連繫恒隆」網站截圖
恒隆地產（101）老闆陳啟宗（Ronnie）向來樂於執筆喺年報同大家分享環球經濟、地產心得，今年佢有更大工程搞緊！公司內部通訊「連繫恒隆」披露，陳啟宗搵人寫一本有關恒隆近60年嘅歷史書，仲訪問咗多位猛人㖭。
唔少本地大孖沙都有搵人寫自傳或公司歷史，好似恒地（012）主席李兆基、銀娛（027）創辦人呂志和，甚至太古A（019）都有，陳啟宗一向高調，為公司出書都好正路。
華華走去八卦恒隆本書有乜猛料內容，公司回覆話未講得住，只肯講本書將於明年第三季面世，受訪者包括以前同現職管理層、陳氏家族成員、恒隆長期服務員工同生意上或其他方面合作過嘅本港政商界猛人或佢哋嘅後人，名單一直加緊。
邀商業史專家執筆
肯定嘅係，陳啟宗今次唔會親自執筆，反過來做受訪者，並搵來一間本地大學嘅商業史專家負責編寫。
恒隆暫時只肯分享一張公司創辦人陳曾熙先生嘅插圖，插圖出自本地年輕插畫家Don Mak手筆，之後仲有更多插畫家加入製作。
「連繫恒隆」官網亦有條片，陳啟宗喺片中透露，呢本書將會記錄恒隆60年來高山低谷嘅歷程、文化，家族傳承又如何跟企業管治並行，令公司行得暢順。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
