操盤手劄記：識投資不如識投胎
■復藥受惠於「健康中國」國策，股價呈三角突破，可留意。 互聯網圖片
踏入「五窮」，樓市唔窮，股市難講。樓價已連升12個月兼創新高，一年累升17.8%；不過，樓價指數CCL與恒指相關系數係0.1，接近完全無關係。金融海嘯至今近十年，CCL暴升1.7倍，恒
指只升7成。現時買得起樓嘅，多數要靠父幹，識投資不如識投胎！
講番港股，恒指5月首個交易日就重越關鍵阻力位24649，即大時代浪頂28588至浪底18278嘅0.618倍黃金比率反彈阻力；不過，升勢能否持續成疑，一來升市唔全面，二來升市成交縮，加上內地金融去槓桿，外圍形勢又複雜，估計短期仍受制25000關，24500有支持。
美國聯儲局呢兩日議息，本港時間今日（周四）淩晨2時公佈結果。朝鮮地緣政治風險，亦令市場有所顧忌。話時話，北韓一個月內三次試射導彈，軍隊又成日實彈演練，咁燒錢法，遲早破產！
唔少藍籌5月除息，引致即月期指大低水，若果大戶要造淡，往往趁住呢啲時勢；不過市況回調亦造就入市時機，但短線似賭大細，宜作中線部署，要留意公佈首季業績嘅國企，我就睇中復星醫藥（2196）。
剛派成績表嘅復藥，經調整後首季純利為5.18億元人民幣，按年增長20%，好過預期。集團業務涵蓋製藥、銷售醫療設備、提供醫療服務等，並正於內地構建生物技術版圖，子公司復宏漢霖係內地一線單克隆抗體（mAbs）生產商，旗下藥物利妥昔單抗（Rituxan）處於第三階段臨床測試，預計明年面市，有望納入醫保名冊。
復藥受惠於「健康中國」國策，其生物仿製藥又邁向高速增長期，即將發售嘅6項單克隆抗體生物製劑，市場價值料達200億元人民幣。集團準備分拆Sisram Medical本港上市，其持股95.3%嘅Alma Lasers，舊年實現營業收入7.86億元人民幣，增長14.2%，值得留意。綜合市場預測，復藥今、明兩年每股盈利分別增長11.3%及15.2%，對應市盈率為19.3倍及16.8倍。睇走勢圖，復藥呈三角突破，現價29.75元，上望33元。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
