大棋局：
2018新貨幣秩序（完）
■現時數字貨幣受地下交易歡迎，理由係去中心化。 資料圖片
如果任賢齊飾演的葉國歡，打劫先嚟發現銀行已唔再用現金，《樹大招風》要點樣拍？這不是笑話，2013年斯德哥爾摩一個搶匪打劫瑞典北歐斯安銀行時，銀行職員同佢講：「我哋一蚊現金
都冇。」搶匪冇與時並進，唔知道瑞典1,600間銀行分店中，有900間已唔接受現金存款，2016年瑞典只有15%消費交易用現金；丹麥更由政策主導，部份零售商有權拒收現金。經常有報道吹捧中國電子貨幣交易領先，其實北歐已邁向無現金社會。
銀紙可能會成為歷史。全球經濟增長緩緩向下，已過咗昔日爆升期。如此趨勢下，難再出現80年代息口加到20厘嘅情況。換句話，當出現經濟衰退時，央行透過減息嚟刺激經濟嘅空間越來越少，最終要再次用上負利率。近年歐洲及日本實行負利率成效不彰，因實行負利率的前提，就係要無現金社會。無現金揸手，負利率先可以強行抽你貨幣稅同焗你使錢。所以bitcoin係一個試驗品。
現時數字貨幣受地下交易歡迎，理由係去中心化。然而中國已表明會由央行自己造一套數字貨幣，並爭取成為第一個國家咁做；俄羅斯原本嘅態度係禁止數字貨幣，最近已表示2018年會認可之，也就係《經濟學人》預告新貨幣秩序嘅年份。當數字貨幣變成由央行揸旗，《1984》描述嘅時代將會到臨。
覆水難收，美國要縮減資產負債表，稍有失誤便會引起金融動盪。各國雖面對大美元衝擊，亦睇準美國必須步步為營嘅機會，隨時搶灘。美國最多加息3至4%，歐洲、日本的QE亦面對兩年內無債可買窘局，故此收水過程中若出現經濟動盪，各國已冇幾多招數可以用。大美元台戲若能唱落去，美元繼續做莊，惟恐怕係最後一次續命。當新貨幣秩序出現時，或由SDR開始，但數字貨幣及黃金將來會佔一席位。
Mr. Tregunter
本欄逢周二刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com
