金手指：小時代，焗買股
■小時代幾時要落車？睇嚇耶倫幾時行出來鷹袍加身。 資料圖片
對上數月，花旗國滯後經濟數據冇個啱數。不過可能因啲一路都錯嘅領先指數一路造好，聯儲局就每季都收緊貨幣政策。呢個方向，到大約兩三周前，喺最後一次加息後，開始引來好多大行同獨立分析員異口同聲話：「頂，好收
唔收，𠵱家先收水？搞錯呀，耶倫想先股災、再金融危機呀？」
唔知係咪呢啲聲音太勁，上周花旗國國會半年一度嘅聽證會上，耶倫忽然chok咗句：「今次加息潮嘅息口頂，將會比大家預期快到。」嘩！之前啲數據有幾差，都繼續唔理咁加，忽然呢句180度飄移呀！
上周五美股近乎由頭升到尾，不過禮拜一香港跟啲唔跟啲，原因係大陸股市乏力。不過，中央一定睇實聯儲局，如果佢哋唔再收緊，已跌唔少嘅美滙指數進一步下滑的話，咁中央亦可放軟手腳，唔使繼續勒住啲貨幣供應。港股「小時代」降臨。
「小時代」同「大時代」有乜分別？就係啲細價股唔會參與。今次繼續追大價股。我自己禮拜一都入市，一籃子咁買，有騰訊（700）、港交所（388）、瑞聲（2018）、惠理（806）、鴻騰（6088）。唔知開邊瓣，求其博Nasdaq同大股繼續升。
當然，呢轉要識落車。方法簡單，就係如果耶倫行出來又鷹袍加身，咁就平倉。點都唔同聯儲局鬥。呢個又180度飄移，可能永遠唔來，亦可能今周出現，所以買股更要搵啲流通量夠，話走就走嘅股份。今次焗買，冇計。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
