財經評論：千二億投注背後
■馬季煞科，全季總投注額1,174億元，創歷史新高。 資料圖片
馬季昨日煞科，馬會昨日公佈，全季總投注額1,174億元，增加五個賽日後止跌回升，打破前季1,079億元的舊紀錄，再次創下歷史新高，並首度突破一季1,100億元大關，長此下去，全年有馬跑的確不是夢。
1,174
億元，如果應用於地產市場，夠買98幢「劏房之霸」的屯門菁雋。如果應用於股票市場，就夠買起全間新世界（017）有餘（該股份市值逾1,000億元）。
不過，有趣的是，有份促成1,174億元的馬迷，有不下於一個朋友都話有興趣買屯門劏房之霸，上車做業主。其中一個家住荃灣嘅老友，母親是多間茶記老闆，不愁衣食住行，但早排好認真咁話，想在馬會身上搵到呢個劏房盤的首期，不想靠母親，靠自己一手一腳賺錢上車。
結果，他於今個賽季，淨計投注額，其實都差不多夠畀一個屯門單幢樓如利寶大廈等同類物業的首期，他投注所得回報是幾多，據他自己親口所述，最少有一半貢獻了馬會的草皮，他的上車路因此而遠了。
說穿了，不少人都希望在馬會身上找到自己的「目標」，當中不少人都好像這名葵湧老友一樣，不想靠父母幫手置業，就只有借助投機賺錢來置業。
單靠打份工，根本已經無咩可能上到車，所以1,174億的背後，可以解讀成，社會上越來越多人想不勞而獲，想一步登天；另一個解讀，是多多少少反映出越來越多人對自己現時的工作前景無希望，收入根本不能夠滿足現有生活。當然，人的慾望是無窮無盡，想一步登天的人太多，最後，大贏家始終是馬會。
記者：黃嘉銘
財經評論 舊文
來源 source: http://hk.apple.nextmedia.com
