笑到最後：冇份贏係慘過輸
■港股兩星期升咗最多1,453點，上周五輕微調整無可厚非。 資料圖片
投資嘅「普世價值觀」只有一條：就係冇份贏慘過輸。呢種心態喺基金界極普遍，因為基金要追指標，升市落後大市罪大惡極，熊市一齊輸仲有得解釋。就係驚冇份贏，上星期本欄亦都轉軚要睇好，揀啲北水買得急
嘅股份掃，同時亦都見到唔少本身睇淡嘅人逼住要追番貨，當大家都開始追貨，上星期嘅升幅又開始放緩，上周五收市後夜期跌104點，到ADR收市就升返32點。暫時市況留意到幾樣嘢。
1.港股兩星期升咗最多1,453點，升幅放緩無可厚非，但似乎都唔應該睇淡，因為難得升咗上嚟挾爆淡友，無咁易放生啲期指淡倉，下月再睇勢而行。
2.北水買嘅選擇多咗，早排不外乎滙控（005）同平保（2318），最多加多隻疑似收風股東方海外（316）。翻查上星期十大北水買入股，內銀股多咗，亦都加咗神華（1088）同ASM太平洋（522），相對買得闊咗，對於睇牌跟炒就可能難咗，因為未必一隻炒爆。
3.中國創業板暴跌，萬達及融創（1918）被指受查等因素喺大市升咗之後出現，阻住升勢，但最終不跌反升，估計過多一輪會因為太耐冇講而不存在。
上星期本欄點咗五大北水流入股，最後自己揀咗民行（1988），因為之前買入速度較急，股價相對其他內銀落後。可惜上星期一推介第一日已經即刻見高位8.21元，其後成個星期都喺8蚊上下徘徊，北水買入亦都明顯放緩，上周只增加0.17%至持股4.38%，主要買盤停滯，股價亦變得無力。
本地唔少報價機都無反映內銀股除淨因素，股價圖上無故出現跌勢，相對啲突破同阻力位唔同曬。現企喺中間只能信股價，民行之前突破橫行係7.92元，唔穿可以當佢無事，博北水會繼續買到超過10%持股，一旦穿咗7.92元，可能又去番橫行格局，正股當然總有一日等到，衍生工具就冇得等，要撤退。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
