供給側改革 下一個炒到鋁？
2017年07月24日
中共將在今秋進行黨的十九次代表大會，中央台播出一連10集大型政論專題片《將改革進行到底》，周末茶友聚會，有個中環茶友話忍住悶睇咗幾集，包括講經濟那一集《引領經濟發展新常態》，都睇唔出有乜投資商機。
我話你哋啲芬佬唔識政治，好難
頂得順內地呢啲政治大片，習主席唱到行搞供給側改革，去產能去庫存，唔使睇政治大片都知，而且嗰啲股票亦已經炒緊。我話所謂供給側改革嘅理念，源於胡、溫年代的產能過剩。2008年美國出現金融海嘯，當時溫家寶做中國總理，放水4萬億救市，4萬億流入市場，唔係搞基建就係擴產能。
炒螺紋鋼 大起大落
嗰個時代未嚴打貪污，政府部門又好，國企又好，揸飛人士決定擴大產能有自己着數，搞一條生產線用1億，隨時有1000、2000萬落到袋，大家都搏晒老命擴產能。間間廠都擴產能，要爭取全省第一、全國第一，甚至世界第一，就搞到產能過剩，供過於求，跟住就爆煲，產品價格大跌，出現通縮，生產物價指數跌足4年，經濟下滑。
習主席開出嘅藥方，就係供給側改革，用普通人嘅語言，就係削減產能，減少供應，令產出減少，產品出廠價回升，重現供求平衡。所以炒股者都集中買那些產能減得多的行業，希望相關股份可以由虧轉盈，之前炒鋼股就係咁。
中國游資好多，某個行業產能減到一定程度，產品價格回升，又倒過頭來吸引資金入場炒作，未炒股先炒期貨，挾高有關商品價格，早前螺紋鋼炒風就是如此。螺紋鋼期貨去年底今年初大升，內地螺紋鋼主力合約今年2月升上高位3491，之後急回，下行20%至4月低點2775，技術上進入熊市，但又死唔去，6月又炒上，6月初至今已升了12%，本周最高至3688，又升穿2月高位。現在市場估計炒完螺紋鋼之後，可能會炒到鋁。
削鋁產能 或現炒風
德銀也有類近觀點，佢話上個月山東第一大鋁業公司中國宏橋(1378，魏橋集團屬下公司)減產25萬噸電解鋁過後，山東將加快減產。
德銀在報告中指出，中國鋁業冶煉廠利用率和淨增量的提高，預計今年上半年中國鋁產量將提升10%至3580萬噸，鋁需求則將增加8.5%至3500萬噸，預計供給盈餘將接近100萬噸。但到下半年市場將開始減少，供給盈餘將在明年縮至60萬噸，鋁價面臨上行風險。
由今年初至今，LME期鋁價格累計上漲12%，上周五報1915美元一噸。鋁價由今頭1688美元起步，3月隨著商品炒作潮炒上1981美元，只後略為回落，如今是一個高位橫行的形態。
5月中之後，內地電解鋁生產廠商已向有關監管方面報備了自身產能情況，同時要上報違規產能規模。6月中開始，電解鋁行業去產能進度出現加速，同時內地 商品市場總體進入反彈，電解鋁價格也擺脫了之前下滑態勢。
中鋁業績 首季向好
內電解鋁市場的供給缺口加大，預計年內電解鋁供給缺口將增大至100至160萬噸的水平，隨著下半年需求加大，這將推動電解鋁價格進一步上漲。
如果睇好鋁價格前景，香港上市有兩大鋁業股，民企中國宏橋和國企中國鋁業(2600) ，中國宏橋早前被沽空機構狙擊，仍然停牌，可以集中睇睇中國鋁業的情況。
中國鋁業2014年勁蝕162億元人民幣，2015年扭虧賺2.1億，2016年賺4億元，按年升171%。而今年4月公佈今年第1季度實現利潤9.2億元。一季度累計實現營業收入按年增長近1倍，累計實現利潤總額按年增長近4倍，累計實現歸屬於上市公司股東純利按年增長超過20倍。
業績前景 還看鋁價
中國鋁業負責人評論第1季業績時話，中國鋁業今年第1季實現開門紅，並非偶然，一方面中國經濟長期向好；另一方面中國鋁業從年初開始，堅持底線思維原則，全面推行精準管理，繼續開展降本增效專項行動，鎖定責任，掛鈎考核，為實現利潤目標發揮了重要作用。
至於大行業中鋁的估值，在今年初鋁價向上時，已開始提升。今年2月初，麥格理已看好中國鋁業H股，將該公司目標價上調至5.16元(當時股價4.07元)，評級為「跑贏大市」。麥格理指出中鋁透過不同省份削減產能，將有助產品價格提升。
不過到6月下旬，或許受國際鋁價低見1855美元影響，中國鋁業股價跟鋁價回到3.88元左右，券商對中國鋁業目標價看法分歧。摩根士丹利先在6月中發表報告睇好，認為內地鋁業供給側改革將加強，內地政府為降低北京空氣污染，料周邊28個城市的重工業冬季的生產將削減30%，令鋁的生產受到影響。部份企業會關閉，部份產能重置料需要兩年時間完成。此外，發改委將於9月完成違法建設項目的調查，預計約170萬噸已建成但未營運產能面臨取締，加上約255萬噸在建非法產能，合共425萬噸產能受到影響，佔中國的總產能約9%。
大摩話中國鋁業盈利對鋁價變化相當敏感，預計將成最受惠企業，而市場尚未反應該利好，重申「增持」評級，目標價4.30元。
候低吸納 睇下半年
麥格理在6月底亦繼續看好中國鋁業，但將目標價由5.16元下調至4.8元，評級「跑贏大市」，以反映能源及原材料成本上漲。麥格理仍相對樂觀，料中國鋁業今年度盈利會有28%增長。該行指，更好的銷售組合可以抵銷部份成本上升的影響，毛利率可望回復2007至2010年的水平，又估計鋁價會在下半年回升。
不過里昂卻將中國鋁業目標價下調5%至4元。里昂指中鋁庫存高企是短線風險，而且目前企業價值相對稅前盈利達到8倍，屬於相對貴的水平，建議投資者保持耐性，評級維持「跑輸大市」。
中鋁在這些券商報告出來之後，股價開始上升，由6月尾的近期低位3.87元升上7月19日高位4.85元，之後略回吐至上周五的4.66元，估計和鋁價由低位反彈亦有關。
想炒中鋁受惠於供給側改革，現價買入價錢稍貴，有點風險，可以博佢回吐番短期升幅一半，即是回落至4.265元買入，止蝕位定番喺3.84元。若能成功買入，就博鋁價在下半年因供應減少而炒上。若將買入價放高一點，就要明白承受風險較大，因為呢隻股波動都唔細，有時都好chok。但整體而言，估計佢今年業績仍然看好，只要入價較便宜，風險就可控。
陸羽仁
金融High Tea 舊文
來源 source: http://hdfin.stheadline.com
