大茶飯 - 青冰 2017年7月24日
【大茶飯】操盤比揀股更難（青冰）
青冰的專欄「地盤」不多，一星期都係交兩篇稿，但有時的確唔知寫乜好，講冧把定係講心法好呢？由於今次升浪集中在一堆股票，推介過的無理由短時間內再推吧，但係其他落後的板塊，又真係唔爭氣，妖股變身股更加唔係青冰杯茶，所以無奈地有時候都要講些操盤心得，而不是一個冧把。
今年揀股的確唔難，強者愈強，問題就係你敢唔敢買落去，因為強股，總係好貴，此貴未必是估值貴，可能只係比起幾個月前貴，而散戶大多會畏高，所以強勢股總係望多過買，反而強勢股同板塊的落後股，因不同的原因而落後，卻非常多人關注，青冰不否定他們有一天會飛上枝頭，但經驗告知，這個等待是令人折騰的，況且強勢股爆煲，要跌，都係一齊跌，不見得落後股會輸少啲。
揀到好股，仲要好好的調兵遣將，先至可以令組合持續上升。一個健康的投資組合，有5至7隻股是必須的，而這個數字，也暗示了每隻股份應佔15至20巴仙，這亦是書本裡經常提及的分散投資。講到呢度，可能粉絲們已經想鬧青冰：「喂大佬呀！我哋本少，仲點分咁多注呀？梗係一注獨贏啦！」係嘅，青冰都經歷過那些年，所以更加了解到一注獨贏係幾咁毒。傳媒上經常看到某人一隻股可以贏百萬千萬，幾咁威，但成王敗寇，失敗的例子多如繁星，而且嗰啲故仔都唔吸引，點會有人報導吖。再者，人地煲一隻股可能係半年至一年，中間要付出的機會成本，難以量化，散戶上午買股，下午跌咗3%，已經要周圍問人走唔走好，咁點有贏百萬的能耐呢？
有些人會同一個板塊買四五隻股，也自以為分散了風險，實情係大家同氣連枝，就好像近日的手機股，要跌只會一齊跌，當你全個倉都見紅，相信你更難決定止蝕邊隻。係呀，如果你揸住內房或保險頂一頂個倉，那就有更大的空間去防守，食到下個升浪定係止蝕離場，就睇你操盤有冇進步喇。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
