【大茶飯】恆指周三make or break!（青冰）
上星期青冰話渣打(2888)的股東要掉眼淚，估唔到一星期之後，全港股民都要一齊掉，仲要有點浴血的感覺。青冰在月初已經話要暫避美國就業數據，怕佢太靚而打散個市，點知不單止冇跌仲要升多兩天，氣勢之好令青冰也重新入市，結果周四五就中伏了。
如果要賴，係可以賴特朗普嘅，估唔到佢口出狂言，隔住個太平洋同肥金罵戰，不過依家回想，侵侵呢招都算高，無論最後打唔打得成，佢都成功轉移了視線，現在還有誰講通俄之事，政治危機暫時可以化解。有番咁上下股齡，都知道每逢打仗，個市大致都係先急挫再升過，今次影響咁大，無非係怕射核彈，青冰對環球政治唔熟，不作無謂揣測，只知道侵侵係一個商人，商場之上虛張聲勢係一個慣常技倆。
這幾天聽得最多的，就是跌完未，青冰唔知道，但若果你已接近滿倉，又或者揸住好多衍生工具，其實係應該要執下倉，除非你好肯定北韓單野今星期內搞掂，否則不應太進取；如果你一路等機會入市，呢個的確係適當時機，正所謂升唔追，跌又唔撈，其實無必要再每天留意住個股市吖。呢段時間必然很多人說：知唔知每次大跌市，輸得最慘就係個啲撈底搏反彈嘅人呀。青冰絕對認同，如果你撈咗之後一直唔止蝕，係可以慘死的，重點唔係撈，而係止蝕。
如果兩大領袖冇再噴口水，咁今星期最值得留意就係騰訊(0700)的半年業績，第二季度的增長能否再令市場驚喜，將係恆指make or break的因素，青冰偏向再有驚喜，原因好簡單，大行的分析員，日做夜做，斷估真係冇時間打機，仲要係沉迷個隻喎，咁又如何掌握得到王者榮譽呢？青冰一直擔心，騰訊會一直挾到380蚊樓上先出業績，咁個值搏率很低，依家個市氣氛差咗，回到300蚊邊再睇業績，又似乎唔需要咁擔心喇。仲有，恆指服務公司將於星期三公佈季檢，舜字(2382)可否染藍呢？國指的檢討會否加入紅籌及民企呢？如果騰訊入埋國指就真係不得了。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
